E Méindeg de Moien huet d'SPD annoncéiert, wie wéi eng Ministeschposte bei hinne besetze wäert.

Wéi et offiziellt matgedeelt gouf, gëtt de Karl Lauterbach neie Gesondheetsminister. De Karl Lauterbach war wärend der Pandemie ganz vill an de Medie present an huet reegelméisseg nei Corona-Mesurë gefuerdert. Och d'Klara Geywitz gouf als Ministesch fir de Ressort Bau confirméiert, esou wéi och d'Svenja Schulze als Entwécklungsministesch.

De Wolfgang Schmidt iwwerhëlt iwwerdeems de Kanzleramtsministère. D'Christine Lambrecht iwwerhëlt de Verdeedegungsministère, d'Nancy Faeser gëtt Inneministesch an den Hubertus Heil ass zoustänneg fir Aarbecht a Soziales.

An Däitschland gouf et de Weekend iwwer jo gréng Luucht vun den Nationalcomitéë vun der SPD an och vun der FDP fir d'Dräier-Koalitioun. E Méindeg de Mëtteg hunn déi Gréng dann och d'Resultat vun hirer Partei annoncéiert, nodeems d'Memberen zanter bal zwou Wochen online konnten ofstëmmen.

Déi Gréng hunn hiren "OK" mat ronn 86 Prozent ginn, sou dass den Olaf Scholz als neie Bundeskanzler a seng Ekipp e Mëttwoch kënne vereedegt ginn.

Ressorten am Iwwerbléck:

SPD

Kanzler: Olaf Scholz
Kanzleramtchef: Wolfgang Schmidt
Inneministesch: Nancy Faeser
Aarbechtsminister: Hubertus Heil
Verdeedegungsministesch: Christine Lambrecht
Gesondheetsminister: Karl Lauterbach
Entwécklungsministesch: Svenja Schulze
Bauteministesch: Klara Geywitz

Déi Gréng

Vizekanzler: Robert Habeck
Wirtschafts- a Klimaminister: Robert Habeck
Ausseministesch: Annalena Baerbock
Ernierungs- a Landwirtschaftsminister: Cem Özdemir
Ëmwelt- a Verbraucherschutzministesch: Steffi Lemke
Familljeministesch: Anne Spiegel
Kultur a Medien: Claudia Roth

FDP

Finanzminister: Christian Lindner
Bildungs- a Fuerschungsministesch: Bettina Stark-Watzinger
Justizminister: Marco Buschmann
Digital- a Mobilitéitsminister: Volker Wissing