De Kapitän, dee mat als 1. vu Bord gaangen ass, gëllt als den Haaptschëllege vum Schëffsongléck a gouf an Italien zu 16 Joer Prisong verurteelt.

D'Biller si ronderëm d'Welt gaangen. E Croisièresschëff läit no engem Manöver schif virun der Insel Giglio am Waasser a kippt ëmmer méi zu enger Säit ëm. 32 Mënsche, vun de ronn 4.200 u Bord, loossen op deem Freideg, den 13. Januar 2011 an enger vun de gréisste Katastrophen an der Geschicht vun de Croisièren hiert Liewen. De Kapitän Schettino geet mat als éischt vu Bord.

10 Joer Costa Concordia / Reportage Claude Zeimetz

Wéi de Kapitän mat de Gardes côtes Kontakt ophëlt, sëtzt hien net ieren an der Kommandozentral vum Schëff, fir d'Rettungsaktioun ze koordinéieren. Nee, de Francesco Schettino rifft aus engem Rettungsboot un a gëtt vum Mann op der anerer Säit vun der Leitung zimmlech verbotzt a kloer opgefuerdert, nees zréckzegoen. Schlussendlech ass hien deen Eenzegen, dee wéinst dem Accident an de Prisong muss. Am Februar 2015 gëtt de "feige Kapitän" ënnert anerem wéinst onfräiwëllegen Doudschlag esou wéi coups et blessures involontaires zu 16 Joer Prisong verurteelt. E Verdikt, dee fir d'éischt am Appell an dunn och vum héchsten italienesche Geriicht zu Roum confirméiert gëtt. Zanter véier an engem hallwe Joer sëtzt de Francesco Schettino am Prisong. Hien hofft elo op e Prozess virum Europäesche Geriichtshaff fir Mënscherechter zu Stroossbuerg.

RTL

© afp

Et war de Kapitän, dee och fir déi fatal Kollisioun verantwortlech war, well hien d'Schëff ze no laanscht d'Küst manövréiert huet, fir unzeginn oder aus Prestige, wéi dacks gesot gouf. Ma et geet schif an dat bal 300 Meter laangt Schëff rammt ënner Waasser e Fiels, deen et op enger Längt vu 70 Meter opgeschlitzt. Waasser fänkt un anzetrieden, d'Schëff ka séier net méi manövréiert ginn a fänkt un, ëmmer méi ze kippen, ma Passagéier a Gardes-côtes gi fir d'éischt emol eng Dräivéierelsstonn berouegt an net iwwert d'Ausmooss vum Accident informéiert. Wéi d'Membere vun der Crew scho mat Rettungswesten duerch d'Gäng lafen, ginn d'Touristen nach gefrot, zréck an hir Kabinn ze goen. Réischt géint 22.30 Auer fänkt d'Evakuatioun un.

D'Schëff kippt ëmmer méi. Verschidde Passagéier sprangen an d'Waasser, schwammen déi 100 Meter bis op d'Insel. Anerer bleiwen awer am Schëff agespaart. Fir 32 Persoune sollt all Hëllef ze spéit kommen.

D'Insel Giglio denkt den 13. Januar 2022 um 10. Anniversaire vun dëser Tragedie un d'Affer. En Donneschdeg den Owend huerelen och d'Sireenen, wéi all Joer den 13. Januar 21.45 Auer, also déi Auerzäit, wéi den Accident geschitt ass. Famill an Iwwerliewender gi sech nëmme wéineg erwaart, ënnert anerem wéinst Corona. Fir vill vun hinne wier et awer och nach ëmmer bedréckend, fir zréck op d'Onglécksplaz ze kommen. Déi meescht Passagéier hunn de proposéierte Schuedenersaz vu 14.000 Euro op de Kapp acceptéiert. Alles an allem huet Costa Concordia méi wéi 80 Milliounen Euro bezuelt.

RTL

© AFP (Archiv)