Duerch ee schwéiert Donnerwieder mat Orkanstäerkt goufen zu Paderborn Dosende Mënsche blesséiert.

Lëtzebuerg ass nach gutt dervukomm. De CGDIS notéiert keng Tëschefäll wéinst dem Stuerm e Freideg. Meteolux hat virun heftegem Reen, zolittem Wand a Knëppelsteng gewarnt. E Freideg am Nomëtteg gouf d'Meteo-Alerte vu giel op orange erofgestuuft. Virun allem am Norden hat et dann och kuerzzäiteg méi kräfteg gestiermt, de Rescht vum Land blouf awer verschount.

An Däitschland goufen et allerdéngs iwwer 60 Blesséierter an een Doudegen. Besonnesch staark getraff gouf virop Nordrhein-Westfalen. A Rheinland-Pfalz ass e Mann vun 38 Joer an der Géigend vu Koblenz gestuerwen, wéi hien am iwwerschwemmte Keller e Stroumschlag krut. Duerch en Tornado sinn zu Paderborn eleng 43 Mënsche blesséiert ginn. 30 hu missten an der Klinik behandelt ginn. De Stuerm soll an der Stad Materialschued a Milliounenhéicht hannerlooss hunn. Eng Abberzuel Diecher sinn ofgedeckt ginn, Beem sinn ëmgefall a Fënsterscheiwe geplatzt. Den ëffentlechen Transport gouf gestoppt. Vun der Police war et den Appell un d'Leit, fir doheem ze bleiwen.

Och zu Lippstadt gouf en Tornado registréiert, dee fir massive Schued gesuergt huet. Den Zentrum vun der Stad bleift um Samschdeg gespaart, well nach ëmmer Deeler vun Diecher riskéieren erofzefalen. Informatioune vun ntv no soll den Tornado Wandspëtzte vu bis zu 250 km/h gehat hunn. En drëtten Tornado gouf et zu Lütmarsen engem Staddeel vun Höxter.

Zu Andernach an zu Neuwied am Norde vu Rheinland-Pfalz sinn e Freideg am Nomëtteg der Police no "extrem" Knëppelsteng erofkomm. Dës sollen een Duerchmiesser vu bis zu 5 Zentimeter gehat hunn. Wéi d'Police matgedeelt huet, si Fënstere vun Autoen zerstéiert ginn. Dat war och op Biller op de sozialen Netzwierker ze gesinn.