Bei der Parlamentswal huet de konservative Regierungschef Scott Morrison een däitlechen Echec kasséiert. Den Anthony Albanese gëtt neie Premier.

Déi sozialdemokratesch Labour-Partei mat un der Spëtzt dem Anthony Albanese konnt nämlech 71 vun am Ganzen 151 Sëtz am Parlament ofraumen. Fir eng Majoritéit brauch een der 76.

Australien wëll säi schlechte Ruff als Klimasënner mam neie Premier Anthony Albanese lass ginn. Hien hat d'Lutte géint de Klimawiessel zum zentralen Thema vu senger Walcampagne gemaach a sech géint de liberalen, konservative Scott Morrison duerchgesat, deen no enger Rei Klimakatastrophen an hallefhäerzege Mesurë géint de Klimawandel ze Lescht an der Kritik stoung. Den Albanese versprécht den CO2-Ausstouss vun Australien bis 2030 ëm 43% ze reduzéieren.

Den neie Premier gëtt schonn e Méindeg vereedegt. Den Dag drop gëtt den Anthony Albanese zu Tokio erwaart, wou hie mam US-amerikanesche President Joe Biden an de Regierungscheffen vu Japan an Indien am Kader vum sougenannte Quad-Sommet zesumme kënnt. Bis elo ass allerdéngs nach net gekläert, ob den neie Regierungschef eleng mat senger sozialistescher Labour-Partei regéiere kann oder eng Minoritéitsregierung féiere wäert. Wéinst dem komplizéierte Walsystem an Australien kéint et nach daueren, bis alleguerten d'Sëtz am Parlament verdeelt sinn. Gutt eng Dose Sëtz sti bis elo nach net fest.