Bei engem heftege Biewen an der afghanesch-pakistanescher Grenzregioun sinn offiziellen Informatiounen no op d'mannst 920 Mënschen ëm d'Liewe komm.

Wéi d'staatlech Noriichtenagence Bakhtar mellt, sinn op d'mannst 600 weider Mënsche beim Äerdbiewen an der Provënz Paktika blesséiert ginn. D'Zuele vun den Affer kéint nach weider eropgoen.

Autoritéite vun den Taliban hu ugangs vun Honnerte Blesséierten an Doudege souwéi Dosenden zerstéierten Haiser geschwat. Rettungsekippe wiere mat Helikopteren an d'Onglécksgebitt ënnerwee.

De Regierungsspriecher vu Kabul huet op Twitter Hëllefsorganisatiounen opgeruff, den Affer vum Biewen direkt ze hëllefen, fir eng humanitär Katastroph ze verhënneren. Wéi et heescht géingen och d'Awunner aus der Géigend selwer Hëllef organiséieren. "Déi lokal Mäert sinn zou an all d'Leit sinn an de betraffene Gebidder", sot de Chef vun der Provënz Paktika. Sëllege Blesséierten aus dem Bezierk Giyan wieren an d'Spidol bruecht ginn.

D'Informatiounen iwwert d'Stäerkt vum Äerdbiewe variéieren. Wärend pakistanesch Autoritéiten d'Biewe mat enger Stäerkt vu 6,1 uginn hunn, war et der US-Äerdbieweautoritéit USGS no e Biewe vun enger Stäerkt vu 5,9 mat engem méi schwaachen Nobiewen. Deemno wier d'Äerdbiewen südwestlech vun der Stad Chost bei der Grenz mam Pakistan a ronn zéng Kilometer Déift gewiescht.

RTL

© AFP