Dass ëmmer méi Cannabis consomméiert gëtt, féiert derzou, dass d’Santés-Ariichtungen ëmmer méi belaascht ginn.

Dat beseet op d’mannst den neiste Joresrapport vum UNO-Büro fir Drogen- a Verbriechensbekämpfung UNODC.

An der EU wier Cannabis d’Ursaach fir all drëtt Drogen-Therapie, an Afrika oder Latäinamerika géif et schonns d’Majoritéit duerstellen.

De Cannabis, deen op de Marché kéim, géif ëmmer méi staark ginn, an deementspriechend méi grouss wier och d’Sucht-Gefor, heescht et am Rapport, deen zu Wien virgestallt gouf.

An Nordamerika géif als Konsequenz vun der Legaliséierung vu Cannabis och méi konsuméiert ginn an dat virun allem vu jonken Erwuessenen. Ëmmer méi e groussen Undeel vu psychiatreschen Stéierungen a Suiciden stéing do a Relatioun mam reegelméissege Gebrauch vu Cannabis, heescht et am UNO-Rapport.

Domat wär de Konsum, dee wiisst, eng zousätzlech Belaaschtung fir d'Gesondheetswiesen.

Dernieft géif et Suerge maachen, dass Kokain nees méi beléift géif ginn, an zwar net just op de soi-disant «klassesche» Mäert an Nordamerika an an Europa, mä lo och an Asien an an Afrika.