Am Hafe vun der jordanescher Stad Akaba ass gëftege Chlorgas aus engem Container ausgetrueden, nodeems dëse beim Verlueden erofgefall ass.

Beim Virfall sinn op d'mannst 13 Mënschen ëm d'Liewe komm, ronn 250 weider Persoune goufe blesséiert. Wéi d'Regierung matdeelt, war aus engem Container am Hafe vun Akaba am Süde vum Land gëftegt Chlorgas erausgestréimt. Den Autoritéiten no hunn d'Spideeler Schwieregkeeten, déi vill Blesséiert ze behandelen.

RTL

An engem Video ass ze gesinn, wéi de Container eroffält a sech direkt eng déck giel Wollek breet mécht.

RTL

Hei gesäit een d'Iwwerreschter vum Kabel, dee gerass war, wouropshin de Container erofgefall ass.

De südlechen Deel vum Hafe gouf evakuéiert. D'Awunner goufen opgeruff, doheem ze bleiwen an d'Fënsteren zouzemaachen. D'Spideeler wiere schonns iwwerlaascht a kéinte keng Blesséierter méi ophuelen, heescht et vun den zoustännegen Autoritéiten.