Dem italieneschen Entrepreneur del Vecchio, deen elo am Alter vun 87 Joer gestuerwen ass, huet net just e Brëllen-Imperium gehéiert.

De Leonardo Del Vecchio war deemno net just de President vum franséisch-italienesche Grupp EssilorLuxottica, hie war och President vun der Lëtzebuerger Holding Delfin, déi mat 13% vun de Parten am Kapital vun der Luxair vertrueden ass. De Grupp Luxottica ass ënner anerem Proprietär vun der Brëllemark Ray-Ban.

Zejoert huet de Leader um Maart vu Brëller an Optiken en Ëmsaz vu bal 20 Milliarden Euro realiséiert. 180.000 Leit schaffen an 150 Länner fir EssilorLuxottica.

Säi privat Verméige gëtt vu Forbes op eng 26 Milliarden Euro geschat. Italienesche Medien no wier de Leonardo Del Vecchio an engem Spidol zu Mailand gestuerwen. Zënter Woche louch hien hei wéinst enger Longenentzündung am Spidol a krut intensiv Fleeg.

Rezent war d'Luxair an de Nouvellen, nodeems de President vun der BIL, de Luc Frieden, verlaude gelooss hat, datt d'Bank kéint envisagéieren, aus dem Aktionariat vun der Airline erauszeklammen.

D'BIL hält aktuell 13,15% vun de Luxair-Parten, an dat zanter 1948. D'Vente vun dëse Parten ass bis ewell awer nach net realiséiert ginn. De Paperjam hat d'Valeur vun dëse Parten op eng 120 Milliounen Euro geschat.