Am historesche Prozess ronderëm d’Paräisser Attentater vun November 2015 goufen e Mëttwoch d’Urteeler geschwat.

Sechs an en halleft Joer no deene bluddegen Attentater zu Paräis steet de Verdikt fest. 20 Leit ware jo am Ganzen ugeklot, 19 vun hinne goufen op alle Punkte schëlleg gesprach, déi hinne reprochéiert goufen. Dorënner natierlech virop de Mord un 130 Mënschen.

Den Haaptugeklote Salah Abdeslam, den eenzege Member vum deemolegen Terror-Kommando, deen nach lieft, muss liewenslaang an de Prisong. Eng Strof, déi net am Laf vun der Zäit ka reduzéiert ginn. Dat ass d'Urteel vun engem Geriicht zu Paräis, dat e Mëttwoch den Owend public gouf. Et ass déi héchst Strof, déi am franséische Code pénal virgesinn ass.

De Salah Abdeslam sollt sech an d'Luucht sprengen, hat säi Sprengstoffrimm awer ausgedoen, ier hie geflücht ass. Am Prozess goung et ënnert anerem ëm d'Fro, firwat hie säi Plang net ëmgesat huet. Den Abdeslam huet behaapt, et wier aus Mënschlechkeet gewiescht, d'Enquêteuren hate par contre erausfonnt, datt de Sprengstoffrimm futti war a guer net konnt explodéieren. Dat hunn d'Riichter och esou an hirem Urteel zeréckbehalen.

De Fokus louch wärend dësem Prozess natierlech um Salah Abdeslam, mä hie war net deen eenzegen Ugekloten. 19 weider Komplizen hu sech misste veräntweren. 18 ënnert hinne goufen op alle Punkte schëlleg gesprach, déi hinne virgehäit goufen. Bei engem gouf de Virworf vun Terrorismus fale gelooss, hien ass awer wéinst Bedruch verurteelt ginn. Ee vun de Komplize war de Mohammed Abrini, en Numm, un deen ee sech nach dierft erënneren. Och hie krut liewenslängleche Prisong. Hien hat d'Terroristen op Paräis gefouert a war iwweregens och an d'Attentater vum Mäerz 2016 zu Bréissel involvéiert.

Dësen historesche Geriichtsprozess huet bal 10 Méint gedauert a sech iwwer knapp 150 Verhandlungsdeeg gezunn. E Mëttwoch goung en op en Enn, mat engen 2.400 Parties civiles an 300 Affekoten.

Bei den Attacken op de Concertssall Bataclan, de Stade France an op direkt e puer Bistroe waren den 13. November 2015 zu Paräis am Ganzen 130 Leit ëmbruecht ginn.