Zwee nei Memberen an en neit strategescht Konzept...

D'NATO, déi virun dräi Joer vum franséische President Emmanuel Macron nach als "gehierdout" bezeechent gouf, presentéiert sech den Ament op hirem Sommet zu Madrid als sou staark a sou gëeenegt wéi seelen. Russland gëtt elo als "gréisst en direkt Menace" fir d'Sécherheet, de Fridden an d'Stabilitéit vun den Alliéierten ugesinn. Bis viru Kuerzem huet d'NATO nach eng strategesch Partnerschaft mat Moskau ugestrieft. Ma wéi gewosst huet de Krich an der Ukrain d'Kaarten nei gemëscht.

Historeschen Nato-Sommet zu Madrid / Rep. Claude Zeimet

D'Invasioun vun der Ukrain de 24. Februar huet d'Hoffnungen zerstéiert, datt déi grouss Tensioune mat Russland der Vergaangenheet ugehéieren. D'Leitmotiv vun der Stonn heescht Oprëschten, Ofschrecken a Verdeedegen. An dat steet och um NATO-Sommet am Virdergrond.

An Zukunft solle mat méi wéi 300.000 Zaldoten der 7 Mol sou vill en alerte si wéi bis elo. Virun allem soll déi sougenannten Ostflank verstäerkt ginn. D'USA beispillsweis hunn zougesot, dausenden zousätzlech Zaldoten an Europa ze schécken.

Bis viru Kuerzem nach ondenkbar, hu Finnland a Schweden um Hannergrond vum Krich an der Ukrain hir neutral Haltung opginn. E Mëttwoch hunn d'NATO-Partner offiziell d'Bäitrëttsprozedur fir déi zwee Länner lancéiert. Gréng Luucht heifir gouf et en Dënschdegowend a leschter Minutt, wéi d'Tierkei, géint eng Rei Concessiounen hir Blockad opginn huet. Den NATO-Generalsekretär Jens Stoltenberg schwätzt vun engem gudden Accord fir jiddereen.

Et wier dem Wladimir Putin also net gelongen, d'Dier vun der NATO zouzemaachen, ganz am Contraire. Änlech huet sech e Mëttwoch och de Lëtzebuerger Premier Xavier Bettel geäussert: "Hien hat gemengt, e géif an der Ukrain als Held gefeiert ginn. Hien huet et fäerdeg bruecht, datt nei Länner Member ginn an der NATO an datt eng Rëtsch Länner d'NATO nach méi ënnerstëtzen, wéi dat virdrun de Fall war."

Bis déi national Parlamenter vun den 30 Memberstaaten de Bäitrëtt vun den zwee skandinavesche Länner ratifizéieren, kéint et realistesch awer nach 6 bis 8 Méint daueren.

Nieft dem Staatsminister ass Lëtzebuerg zu Madrid duerch den Ausseminister Jean Asselborn an de Verdeedegungsminister François Bausch vertrueden, deen hat d'lescht Woch jo schonn am Detail presentéiert, wéi Lëtzebuerg seng Militärdepense graduell op 1% vum PIB erhéije wëll. Dat ass d'Hallschent vum eigentleche Minimum vun 2%, mä Lëtzebuerg wëll sech an dësem ugespaante Kontext als gudde Partner presentéieren. De Xavier Bettel: "Mir hunn och eng Arméi vun 1.000 Leit. Et muss een och vergläichen, wat den Invest an eng Defense ka sinn. Dat heescht, dat ass bal eng Millioun pro Zaldot. Dat sinn net vill Länner... wann een d'Gréisst vun der Arméi kuckt an och d'Gréisst vun der Zomm, déi een engagéiert. Mä et sinn Engagementer, déi mer geholl hunn."

Wéinst sengen "feindséileger Politik an Handlungen" gëtt Russland am neie strategesche Konzept, op dat sech déi 30 Nato-Partner e Mëttwoch an der spuenescher Haaptstad gëeenegt hunn, elo och als gréisst an direkt Menace fir d'Alliéiert ugesinn.

D'Relatioune kéinte sech réischt dann änneren, wa Russland d'Vëlkerrecht a vollem Ëmfang respektéiert. Per Video huet den ukrainesche President Wolodymyr Selenskyj viru méiglech russeschen Attacken op aner Länner gewarnt. Dat eigentlech Zil vu Russland wier d'NATO, sot hien. Déi Nato huet Kiew e Mëttwoch iwwerdeems zousätzlech militäresch Ënnerstëtzung zougesot, och wann de Krich laang dauert: "Ukraine can count on us for as long as it takes."

Russland iwwerdeems gesäit den NATO-Sommet als Confirmatioun fir déi aggressiv Haltung vum westleche Militärbündnis, sou gëtt de stellvertriedende russeschen Ausseminister Sergej Rjabkow e Mëttwoch op russeschen Noriichtenagencen zitéiert.
Et weist sech eng Solidaritéit tëscht de Länner fir gëeent géintiwwer Russland do ze stoen, sot e Mëttwoch zu Madrid de Lëtzebuerger Staatsminister Xavier Bettel am RTL-Interview. Solidaritéit wëll d'Nato och weider vis-à-vis vun der Ukrain weisen. Um Sommet gouf en Hëllefspak decidéiert, mat deem ënnert anerem Anti-Dronen-Ekipement a Kommunikatiounstechnologië geliwwert solle ginn.  Däitschland an Holland hunn zougesot, dräi zousätzlech sougenannte Panzerhaubitzen ze schécken. An och Lëtzebuerg steet der Ukrain militäresch zur Säit betount de Premier.

Bis ewell chiffréiert sech déi Lëtzebuerger Militärhëllef fir d'Ukrain op 65 Milliounen Euro.

D'Erweiderung ëm zwee Länner wär net just symbolesch, sot en Donneschdeg de Moien am RTL-Interview de Lëtzebuerger Ausseminister Jean Asselborn. Mä eng grouss Verstäerkung. Et wär zwee Länner vun der EU, déi un der Ostflank eng grouss Roll kéinte spillen. D'Leit a béide Länner hätten no der Invasioun an der Ukrain Angscht kritt an dowéinst wär de Wonsch do gewiescht, fir Member vun der NATO ze ginn. D'Tierkei hat jo de Bäitrëtt blockéiert. De Jean Asselborn ass op den "Intermezzo" wéi hie sot vum Erdogan agaangen.

Fir de Lëtzebuerger Ausseminister war dëst eng Strategie vum tierkesche President, déi hie scho méi dacks genotzt huet, esou datt dono jiddereen der Tierkei "Merci" seet, well se de Veto zeréckgezunn hunn. Ma d'Kurdefro war dem Jean-Asselborn just um Rand wichteg, et wier méi ëm Waffe gaangen. Wichteg ass awer elo, datt d'NATO 32 Memberlänner huet.

Extrait Jean Asselborn

En Donneschdeg steet um Sommet zu Madrid de Kampf géint den Terrorismus am Mëttelpunkt grad wéi och déi weltwäit Liewensmëttelkris, bedéngt duerch de Krich an der Ukrain.

De ganzen Interview mam Jean Asselborn