"Russland war e Partner vun der NATO. Haut ass Russland dee gréisste Feind vun der Allianz", sou de Lëtzebuerger Ausseminister um Sommet zu Madrid.

En Donneschdeg den Nomëtteg ass den NATO-Sommet zu Madrid op en Enn gaangen. Fir d'Allianz huet awer eng nei Ära ugefaangen. Russland gëtt vum Partner zeréck zum Feind agestuuft. Déi russesch Menace un der Ost-Flank bréngt mat sech, datt d'NATO-Staaten, mat virop den USA, den Ament net just massiv an Europa oprëschten. Mat Schweden a Finnland wäert d'NATO och op 32 Memberstaate wuessen.

"Et ass eng total aner Welt". Dee Saz kënnt zu Madrid ëmmer nees zeréck, wann ee mam Jean Asselborn iwwer déi aktuell geopolitesch Situatioun schwätzt. Spontan denkt den déngschteelsten Ausseminister un een NATO-Sommet zeréck: Bukarest am Joer 2008. Fir d'éischt an der Geschicht vun der NATO, huet deemools e russesche President als Partner-Staat un engem Sommet vun der Allianz deelgeholl. Op der Agenda stoung dat Joer d'Diskussioun, ob d'Georgien an d'Ukrain kéinten an d'NATO opgeholl ginn.

Vum Partner zur Menace. De 24. Februar huet de Putin definitiv alles iwwer de Koup gehäit mat der Invasioun vun der Ukrain, och wa sech d'Relatioune mam Westen, mat der NATO, schonn iwwer d'Zäit verschlechtert haten.

D'Analys, d'Erfarung vum Lëtzebuerger Ausseminister ass gefrot op engem Sommet wéi dësem. An de Jean Asselborn kléngt net optimistesch.

D'NATO stellt sech nei op, wiisst, rëscht op. Et hält een zesummen, et weist een och d'Muskelen. Si mer zeréck am kale Krich? Responsabel fir déi Situatioun wier just ee Land: Russland. Mat um Pabeier enger vun de stäerksten Arméien. De Jean Asselborn bedauert, datt Moskau den Ament och net eemol déi klengst Fënster opléist, fir mat ziviliséierter Diplomatie déi aktuell Situatioun unzegoen. Deemno bleift just eent, sou den Ausseminister: "der Ukrain ze hëllefen, fir datt se sech ka wieren."

Xavier Bettel: Deklaratioun vun Nato als Menace ass eleng dem Putin seng Schold

De Lëtzebuerger Premier hofft, dass de Putin iergendwa bereet ass, iwwer Deseskalatioun ze schwätzen. D'Tendenz wär aktuell eng aner. Och de Klimawandel gouf zu Madrid als grouss Erausfuerderung ugesinn an diskutéiert. Grad ewéi d'wirtschaftlech Entwécklung, déi misst geséchert ginn. China gouf um Sommet beispillsweis als Rival vum Westen agestuuft.

Iwwerdeem hunn d'Nato-Memberstaaten e Fong fir technologesch Innovatioun an d'Liewe geruff, deen zu Lëtzebuerg wäert domiciliéiert sinn. 1 Milliard Euro sinn an deem Fong dran an 22 Länner bezuelen elo schonn an, esou de Premier Bettel.

Den Nato-Generalsekretär Jens Stoltenberg huet de russesche President Putin opgefuerdert, seng Truppen direkt aus der Ukrain ofzezéien. Um Schluss vum Sommet vun der Allianz zu Madrid sot de Stoltenberg, de Krich géif net nëmmen Dout an Zerstéierung an der Ukrain verursaachen, mä en hätt och Konsequenzen an der ganzer Welt well d'Liewensmëttelpräisser klammen.

Bis 2030 wëllen d'Nato-Staaten dann och iwwer 20 Milliarden Euro zousätzlech fir gemeinschaftlech Ausgabe bereetstellen.