Honnerte Mënschen hunn an engem Viruert vun Chicago den US-amerikaneschen Onofhängegkeetsdag gefeiert, wéi et zu Schëss komm ass.

Am Kader vum US-Nationalfeierdag de 4. Juli gouf zu Highland Park, ronn 40 Kilometer nërdlech vun Chicago, eng Parad organiséiert. No 10 Minutten huet se allerdéngs missen ënnerbrach ginn, well Schëss gefall sinn. Aenzeie schwätze vun am Ganzen 20-25 Schëss.

Op d'mannst 6 Leit sinn un hire Blessure gestuerwen, 25 Mënsche goufen den Autoritéiten no verwonnt. Den Täter gouf no enger Course-poursuitte vun de Beamte gestallt a verhaft.

Den Autoritéiten no soll den 22 Joer jonke Mann vum Daach vun engem Akafszenter erof an d'Mënschemass geschoss hunn, dat mat engem Maschinnegewier. Hien hätt esouwuel op déi Leit, déi matgaange sinn, geschoss, wéi och op d'Zuschauer. Iwwert e méiglecht Motiv ass nach näischt offiziell matgedeelt ginn. Den FBI féiert eng Enquête.

Bannent de leschte Woche koum et an den USA zu senger Serie vu Schéissereien. Mëtt Mee huet en 18 Joer ale Mann an enger Grondschoul zu Uvalde (Texas) ëm sech geschoss an esou 19 Kanner an zwou Enseignantë mat an den Doud gerappt. 10 Deeg virdru si virun engem Supermarché zu Buffalo (Bundesstaat New York) Schëss gefall. 10 Persoune sinn hei gestuerwen, déi meescht vun hinne waren Afroamerikaner. Am ganze Land gouf doropshi fir méi streng Waffegesetzer demonstréiert.