Dréchent, Hëtzt a Bëschbränn maachen de Leit den Ament d'Liewe schwéier. Uechter Europa kämpfe Pompjeeë géint Feier, mä d'Bëschbränn sinn net ze stoppen.

D'Hëtzt dominéiert aktuell an e puer Länner am Süde vun Europa. Op munche Plaze sinn Temperature gemooss gi sou héich wéi nach ni.

Dausende Leit hunn a Frankräich misse wéinst Bëschbränn evakuéiert ginn, wou deels Rekord-Temperature vun iwwer 40 Grad gemooss goufen. Groussbritannien rechent och mat ganz schwieregen 48 Stonnen. Et soll sou waarm gi wéi nach ni op der brittescher Insel.

London huet wéinst der Hëtzt den nationalen Noutstand ausgeruff. Och gesond Leit riskéiere Problemer ze kréien a Spideeler iwwerlaascht ze ginn.

Bëschbränn uechter Europa

Méi wéi honnert Pompjeeë waren e Méindeg am däitschen Nationalpark "sächsische Schweiz" am Asaz, fir e Bëschbrand ze läschen. Dobäi goufen zwee Pompjeeë blesséiert, déi nach op der Plaz hu misse medezinesch versuergt ginn. D'Feier ass an der Nuecht op e Méindeg ausgebrach an huet sech relativ séier op enger Fläch vun 2.500 Quadratmeter ausgebreet. D'Brandursaach ass den Ament nach onbekannt, woubäi d'Police vu Brandstëftung ausgeet, bezéiungsweis vun enger illegaler Feierplaz.

A Frankräich ass südlech vu Bordeaux am Bassin d'Arcachon e grousst Feier ausgebrach, wat mëttlerweil 15.000 Hektar Bësch zerstéiert huet. Doriwwer eraus sinn an der franséischer Uertschaft Teste-De-Buch och hefteg Bëschbränn ausgebrach, déi esouguer bis op d'Plage reechen. Weider hu missen an der Géigend vun der Dune du Pilat 16.200 Touristen opgrond vu Bëschbränn heemfueren, bezéiungsweis virun dem Feier flüchten. Franséische Medieberichter no si mëttlerweil 1.700 Pompjeeën an dëser Regioun am Asaz.
Insgesamt sinn a 64 Regiounen nei Rekord-Temperature gemooss ginn. De Gros dovun laanscht déi westlech Atlantik-Küst, wou den Thermometer op iwwer 40 Grad geklommen ass an och eng ganz Rei Bëscher brennen. Den absolutte franséische Rekord gouf allerdéngs nach net geknackt. Dee gouf 2019 zu Verargues, nërdlech vu Montpellier mat 46 Grad opgestallt.

A Spuenien ass an der Géigend vun der Uertschaft Escober de Tabara en 69 Joer ale Mann dem Feier zum Affer gefall. An der Nopeschgemeng Losacio ass doriwwer eraus och nach e Pompjee an de Bëschbränn ëm d'Liewe komm. Portugisesch Medie beriichten iwwerdeems vu 16 aktive Bëschbränn. 30.000 Hektar Bësch solle bis ewell a Portugal de Flamen zum Affer gefall sinn.

Och op de griicheschen Insele kämpfen d'Pompjeeë géint d'Flamen. Déi griichesch Regierung schwätzt vun 108 Bränn bannent de leschte 24 Stonnen. Eleng op der Insel Kreta sollen e Méindeg de Moien 120 Pompjeeë mat 35 Pompjeesween am Asaz gewiescht sinn.

An Italien gesäit d'Situatioun iwwerdeems net besser aus. Den italienesche Bauereverband fäert, datt duerch d'Bränn eng extrem Perte an der Recolte zustane wäert kommen. Bis zu 70% vum Uebst a Geméis kéint duerch d'Flamen zerstéiert ginn. Virun allem Paprika-, Meloune-, Aprikose-, Auberginne- an Tomate-Felder wäerte vun de Bränn betraff sinn.

Groussbritannien
huet mat méi wéi 40 Grad en neien Temperatur-Rekord gebrach. An der Mëttesstonn goufen zu London Heathrow 40,2 Grad gemooss. Bis ewell louch d'Maximaltemperatur, déi jee op der Insel gemooss gouf, bei 38,7 Grad aus dem Joer 2019. Duerch déi extreem Temperaturen ass den Zuchreseau an Deeler vum Land ausgefall. Wéi den Operateur vum Zuchreseau mellt, géifen op den Haapt-Tracë laanscht déi englesch Ostküst iwwerhaapt keng Zich méi fueren. Et wéilt ee kee Risiko agoen, ma et misst een awer sécher sinn, dass d'Infrastruktur déi héich Temperaturen aushält. Och um Londoner Fluchhafen Luton ginn et Perturbatiounen, well den Tarmac duerch d'Hëtzt beschiedegt gi wier. Eng ganz Rei Flich hu missen annuléiert oder ëmgeleet ginn.