Et ass déi éischt héich US-Visitt zanter 1997. D'Cheffin vum amerikanesche Representantenhaus Nancy Pelosi ass um Dënschdeg am Taiwan gelant.

China hat virun der Visitt schonn emol provozéiert a Kampffliger un d'Grenzlinn mat Taiwan geschéckt. D'Situatioun an der Regioun ass ganz ugespaant. China gesäit Taiwan als en Deel vun der Volleksrepublik un. D’USA loosse Militärschëffer an der Géigend kräizen an erwaarde weider chinesesch Reaktiounen, awer eréischt wann d’Nancy Pelosi Taiwan verlooss huet. E Manöver vu China mat schaarfer Munitioun ass méiglech.
D'Nancy Pelosi ass an Asien ënnerwee. Et war ufanks ongewëss, ob si wierklech op Taipeh kënnt. En Dënschdeg kuerz viru 17 Auer ass si an der Haaptstad Taipeh ukomm.

D'Nancy Pelosi huet no hirer Arrivée per Twitter erkläert, mat dëser Visitt en Zeeche fir d'Ënnerstëtzung vun der Demokratie an Taiwan wëllen ze setzen. Gläichzäiteg géif dës Visitt näischt un der China-Politik vun den USA änneren. China reprochéiert den USA iwwerdeems, mam Feier ze spillen. D'US-Aktiounen an Taiwan wieren extreem geféierlech, heescht et den Dënschdeg den Owend vum chineseschen Ausseministère. Wie mam Feier géif spillen, géif doran ëmkommen, esou déi kloer Menace vu Peking.

China hat mat Konsequenze gedreet. "Mir wäerte gesinn, wat geschitt, wa si sech traut ze kommen", hat de chinesesche Staatschef den amerikanesche President d'lescht Woch um Telefon gewarnt.

Den Interessi - oder d'Nervositéit - wéinst der Rees vum Nancy Pelosi op Taiwan hat iwwregens och dofir gesuergt, datt de Flight-Radar net méi funktionéiert hat. Dat hunn d'Bedreiwer vum Flight-Radar matgedeelt, der Weltkaart um Internet, op där ee live kann all d'registréiert Flich suivéieren. Deemno ware fir eng Zäit d'Servicer extrem iwwerlueden.

Um Flight-Radar konnt een effektiv eng Zäit laang nach de Fluch SPAR19 mat enger Boeing C-40 vun der US-amerikanescher Regierung gesinn, déi ënnerwee war vu Malaysia a Richtung Taipeh, ier de System iwwerlaascht war. D'Maschinn war en Ëmwee ëstlech vun de Philippinnen geflunn, fir net iwwert d'südchinesescht Mier ze fléien.

Jean Asselborn schwätzt vun onnéideger Provokatioun

Et misst een hoffen, datt d'Situatioun net eskaléiert. Et misst een op Diplomatie setzen, och wann et schwéier wier den Ament. Dat sot de Lëtzebuerger Ausseminister Jean Asselborn an enger éischter Reaktioun, kuerz nodeems d'Nancy Pelosi am Taiwan ukomm war.

Ech hat gehofft, datt ons déi Rees géif erspuert bleiwen. Den US-President Biden hat scho gesot, et wier keng gutt Iddi. Ma d'Amerikaner hätten d'Trennung vun de Gewalten. De President kéint der Cheffin vum amerikanesche Representantenhaus net virschreiwen, wat si ze maachen huet, sou de Lëtzebuerger Ausseminister.

Jean Asselborn iwwer Taiwan-Rees / Rep. Sascha Georges

Et wier eng onnéideg Provokatioun. Ma elo dierft ee se net iwwerbewäerten, erkläert de Jean Asselborn: Fir eis Europäer ass ze hoffen , datt näischt geschitt, wat net méi gutt ze maachen ass. D'Chinesen hu jo e Manöver mat schaarfer Munitioun an der Regioun ugekënnegt. D'Amerikaner soten, se bleiwe bei hirer One-China-Politik. Et kann ee just hoffen, datt d'Chinesen näischt maachen, wat net méi gutt ze maache wier.

Datt et direkt zu engem Krich kënnt, mengt de Lëtzebuerger Chefdiplomat awer net: Ech ka mer net virstellen, datt Chinesen oder Amerikaner elo eng militäresch Aktioun starten, déi alles op d'Kopp dréint. Wichteg ass, datt bei der Landung näischt geschitt ass. Et war jo gefaart ginn, datt de Fliger vum Pelosi vun der chinesescher Militäraviatioun géif gedränkt ginn. Dat wier kuerzfristeg positiv.

De Rescht Vertrauen tëscht den USA a China wier awer elo verluer. Wat och negativ Repercussioune fir de weltwäite Klimaschutz kéint hunn. Elo misst déi international Communautéit an och d'EU probéieren ze deseskaléieren. D'Welt wier ëmmer méi an zwee gespléckt: Mir sinn an enger Welt ukomm, déi opgedeelt ass an China a Russland an an d'USA an d'EU. Dat wier net gutt fir déi weltwäit Entwécklung.

Hien hätt ëmmer gehofft, datt Diplomatie eppes wier, fir Probleemer ze léissen.
Wann d'Diplomatie awer einfach ewechgedréckt géif ginn, net méi géif zielen, dat wier schlecht fir d'Welt, sou nach de Jean Asselborn.