"Dës Dréchent ass déi schlëmmst, déi hei am Land jee opgezeechent gouf", sou d'Premierministesch Elisabeth Borne.

D’Premierministesch Elisabeth Borne huet follgend Deklaratioun erausginn: "Dës Dréchent ass déi schlëmmst, déi hei am Land jee opgezeechent gouf. An d’Situatioun kéint weider 15 Deeg daueren, respektiv nach méi beonrouegend ginn."

Déi mëttlerweil drëtt Canicule huet Frankräich am Grëff. Dës wäert souguer nach méi hefteg ausfale wéi am Juli. Virun allem sinn déi Regioune betraff, déi souwisou scho wéinst der Hëtzt ze kämpfen hunn. Dëst huet massiv Auswierkungen op d'Landwirtschaft an de Schëffsverkéier op Flëss.

An 93 vun de 96 Departementer vu Frankräich goufe Restriktioune fir de Waasserverbrauch op lokalem Niveau decidéiert. D'Krisen-Cellule soll elo weider Aktiounen erméiglechen a besser ënnert de Regioune koordinéieren. E Freideg an der Mëttesstonn koum d'Nouvelle, datt a Frankräich 100 Gemenge keen Drénkwaasser méi hunn.

Hei zu Lëtzebuerg ginn et 102 Gemengen, an där vu Réiden un der Atert huet d'Administratioun wéinst Aarbechten um Drénkwaassernetz a wéinst der Hëtzt eng Rei Verbueter verhaangen. D'Wäsche vun Autoen oder Garagenafaarten ass zum Beispill verbueden. Et si Strofe vu 25 bis 250 Euro virgesinn.