Bei enger Explosioun op engem Maart an der armenescher Haaptstad Eriwan sinn op d'mannst 3 Persounen ëm d'Liewe komm an ronn 60 Leit goufe blesséiert.

Donieft ginn de Secouristen no nach op d'mannst 25 Persoune vermësst, no deenen ënnert de futtisse Gebaier gesicht gëtt.

D'Explosioun e Sonndeg hat e Feier ausgeléist um Groussmaart vu Surmalu, sou de lokale Katastropheschutz. Dëse Maart ass Sonndes an der Reegel nawell vill besicht. Wéi d'Autoritéite sur Place an enger éischter Phas matgedeelt hunn, ass d'Detonatioun vun engem Lager mat Knupperten ausgaangen. Doropshin ass och eng Gasleitung explodéiert. Eng offiziell Bestätegung dofir gëtt et awer nach net.

Ee Gebai ass an de Koup gefall. Mat Baggere gëtt weiderhi versicht, nach Leit an den Debrisen ze fannen. 10 Iwwerliewender konnten esou gebuerge ginn an eng Läich. Eng 200 Pompjeeë waren op der Plaz. D'Feier war nach no Stonnen net aus. Wéi et zur Explosioun koum, war am Ufank nach onkloer. Wéi verschidde Medien no Zeienaussoe mellen, wier et op enger Plaz, wou Knupperte gelagert sinn, zur Explosioun komm. Eng Confirmatioun gouf et nach net.

Op Fotoen a Videoe a sozialen Netzwierker war eng schwaarz Dampwollek ze gesinn. Dono wieren e puer Detonatioune ze héiere gewiescht.

De Katastropheschutzministère huet no der Explosioun eng Lëscht mat 25 Nimm drop verëffentlecht, vu Leit, déi vun hire Famille gesicht ginn.