Déi massiv Hëtzt an déi laang Drécheperiod suergen europawäit fir Bëschbränn, Problemer an der Drénkwaasserversuergung oder och niddereg Peegelstänn.

Bei schlëmme Bëschbränn an der spuenescher Regioun Valencia sinn 11 Passagéier vun engem Regionalzuch blesséiert ginn, dräi dovu schwéier. Den Zuch huet wéinst dem villen Damp musse kuerz stoe bleiwen, fir kënnen zeréck ze fueren.

Obwuel den Zuchchauffer seng Passagéier dozou opgeruff hat, d'Rou ze behalen, ass d'Panik bei de Passagéier gewuess, wou d'Flamen ëmmer méi no koumen. E puer vun hinnen hu schliisslech d'Fënsteren ageschloen a sinn aus dem Zuch gesprongen. Dräi vun den insgesamt 48 Passagéier u Bord hu sech dobäi schlëmm verbrannt.

Och zwee Pompjeeë goufen an där Géigend verwonnt, anerer misste sech ënner Liewensgefor zeréckzéien. Dëst an e weidert Bëschfeier sollen zesumme scho ronn 15.000 Hektar Bësch zerstéiert hunn. 2.000 Mënschen hu mussen evakuéiert ginn.

De Gardaséi op déifstem Waasserniveau zanter 15 Joer

De Gardaséi ass um nidderegsten Niveau zanter 15 Joer. De Waasserniveau géing just nach 30 Zentimeter iwwert dem Referenz-Waasserniveau leien, sou de Gianluca Ginepro, Direkter vu Garda Unico. Den Duerchschnëtt vun de leschte Jore louch bei 80 bis 100 Zentimeter an der selwechter Joreszäit.

Zanter 2007 ass dëst deemno déi nidderegste Miessung, deemools war de Peegel op 9,9 Zentimeter iwwert dem Referenz-Niveau erofgaangen.

"Dat ass eng Situatioun, déi mir am A behale mussen, awer am Moment gëtt et keng Problemer, wat d'Notze vum Séi fir Aktivitéite wéi Seegelen oder Wandsurfen ugeet", sou nach den Ginepro. Hien huet verséchert, dass et dem Tourismus an der Regioun immens gutt geet.

Et ass déi schlëmmsten Drécheperiod an de leschte 70 Joer. Dat hat déi italienesch Regierung Ufank Juli matgedeelt an den Noutstand fir e puer Regiounen am Zentrum an am Norde vum Land verhaangen.

A groussen Deeler vun Europa huet déi massiv Hëtzt gemëscht mat wéineg Nidderschlag grouss Schied an der Landwirtschaft verursaacht. Sëllege Bëschbränn hunn d'Saach net vereinfacht. D'Ëmweltorganisatioun WWF huet en Dënschdeg erkläert, dass hire Berechnungen no d'Zuel vun de Mënschen an Europa, déi ënner deels extremem Waassermanktem leiden, bis 2050 ëm ronn 50 Prozent an d'Luucht ginn.

Restriktioune beim Drénkwaasser zu London

Och Groussbritannien kämpft aktuell mat héijen Temperaturen an enger laanger Dréchent. Vun nächster Woch un, gëlle fir d'Awunner vun der Haaptstad London Restriktioun bei der Notzung vum Drénkwaasser. Eng éischter Kéier zanter 10 Joer, hunn déi zoustänneg Autoritéiten esou Restriktioune fir déi ronn 15 Millioune Mënschen zu London an an der Regioun Oxford decidéiert.

Änlech Mesurë gëllen deels och schonn an aneren Deeler vum Land, esou dass Enn nächster Woch knapp 30 Millioune Mënschen a Groussbritannien Waasser musse spueren.

Am Juli waren hei Rekordtemperature vu méi wéi 40 Grad gemooss ginn. An de leschten Deeg gouf et dogéint gréisser Donnerwieder. Dowéinst besteet elo de Risiko vun Héichwaasser, well d'Biedem ze dréche si fir de ville Reen opzehuelen.