D’Kärentransporter, d’Situatioun ëm d’Atomkraaftwierk bei Saporischschja a Solutiounen, fir aus dem Krich erauszekommen, wäerten zu Lwiw diskutéiert ginn.

Ukrainesch Truppen hunn e Freideg och erëm d'Atomkraaftwierk zu Saporischschja attackéiert, heescht et aus Russland. Dobäi wier awer keng kritesch Infrastruktur getraff ginn. Béid Länner maache sech weider géigesäiteg fir d'Attacke responsabel, déi et ëmmer nees op d'Atomkraaftwierk vun Saporischschja gëtt. Zanter Ufank Mäerz ass dat grousst Atomkraaftwierk ënner russescher Kontroll.

A sengem gewinnte Videomessage sot den ukrainesche President Selenskyj, dass hie fir déi nächst Woch mat méi Ugrëffer aus Russland rechent. De 24. August ass nämlech den ukrainesche Nationalfeierdag. D'Land feiert dann den 31. Joresdag vun der ukrainescher Onofhängegkeet vun der Sowjetunioun. De 24. August ass de Krich iwwerdeems op den Dag genee 6 Méint am gaangen.

Nodeems et en Dënschdeg nees zu schwéieren Explosiounen an Ugrëff op militäresch Infrastrukturen op der vu Russland annektéierter Hallefinsel Krim komm ass, rifft de President Selenskyj d'Awunner vun de besate Gebidder op, virsiichteg ze sinn a sech vu russesche Militär-Anlagen an Depoten ewechzehalen. Bekennen deet d'Ukrain sech net zu den Uschléi op der Krim, mä ëmsou manner Ekipement d'Russen hätten, ëmsou méi séier kéint d'Ukrain de Krich gewannen, betount de Selenskyj.

Iwwerdeems huet de Blockage vun de Kärentransporter aus der Ukrain d'Hongersnout an Afrika verschäerft. Och ginn duerch de russeschen Ugrëffskrich weiderhi wichteg Kärestocken zerstéiert, wéi rezent Biller aus der Géigend vun Donezk weisen.

Am Optrag vun de Vereenten Natiounen huet d'Brave Commander, dat éischt Schëff mat 23.000 Tonne Käre fir déi humanitär Hëllef, d'Ukrain awer en Dënschdeg a Richtung Ethiopien verlooss. Zënter ugangs August konnte bis ewell 21 Schëffer Kären aus der Ukrain eraustransportéieren. En Ofkommes tëscht Russland an der Ukrain, patronéiert vun der Tierkei an de Vereenten Natiounen, huet dëst erméiglecht.

Deemno erhofft ee sech vun de Gespréicher en Donneschdeg Léisungsusätz. Zemol, wat d'Situatioun ëm d'Atomkraaftwierk bei Saporischschja ugeet. Zanter Deeg geréit et ëmmer nees ënner Beschoss. Russland an d'Ukrain weise géigesäiteg mam Fanger openeen. Vun ukrainescher Säit bereet ee sech schonn op dat Schlëmmst vir. Sollt dat gréisst Atomkraaftwierk an Europa getraff ginn, kéint dat Experten no zu enger nuklearer Katastroph féieren, vergläichbar mat där vu Fukushima.

De Philip Crowther am RTL-Journal aus der Ukrain

Philip Crowther live aus der ukrainescher Stad Lwiw
Wat gëtt sech erwaart vum Treffe Guterres - Selenskyj - Erdogan? Eng Aschätzung vun eisem RTL-Korrespondent.