Op Korsika ass de Kont vun den Doudesaffer no deem schlëmme Stuerm op 5 geklommen.

Um Donneschdeg an de spéide Moie gouf et hei staark Donnerwieder mat Wandspëtzte vu bis zu 224 Stonnekilometer. Dobäi ass op engem Camping e Bam op e Bungalow gefall, woubäi e 46-Joer-ale Mann ëm d'Liewe komm ass. E Kand vun 13 Joer ass vun engem Bam erfaasst ginn an eng Fra vun 72 Joer gouf vun engem Strand-Prabbeli getraff. Ausserdeem hunn eng Persoun an engem Kayak an e Fëscher de Stuerm net iwwerlieft.

De franséischen Inneminister Gérald Darmanin huet annoncéiert, dass hien nach op d‘Insel wäert fueren.

Korsika wier eréischt ganz spéit an d‘Vigilance orange gesat ginn, esou dass ee keng Zäit gehat hätt fir sech ze preparéieren, esou d‘Kritik vun den Autoritéiten. Dofir waren och vill Booter eraus op d‘Mier gefuer, ouni sech der Gefor bewosst ze sinn.