Bei de Presidentiellen a Brasilien huet den Inacio Lula da Silva e Sonndeg den éischten Tour fir sech entscheet.

11 Presidentschaftskandidate waren dobäi, ma de Match huet sech tëscht den zwee Favoritten, dem fréiere President Lula da Silva vun der lénker Aarbechterpartei an dem aktuelle President Bolsonaro ofgespillt.

156 Millioune Mënsche sollten e Sonndeg a Brasilien wielen. De lénke Lula, deen zu senger Zäit wichteg sozial Reformen duerchgesat hat oder awer den neoliberale President Bolsonaro, dee fir massiivt Ofholze vum Amazonas steet a vun der Waffelobby an de grousse Véiziichter ënnerstëtzt gëtt, dat waren déi zwee Haapt-Protagonisten.

De Philip Crowther vun der Plaz fir RTL

De fréiere President Lula, dee scho vun 2003 bis 2011 op deem Poste war, krut ronn 48% vun alle Stëmmen, den aktuelle President Jair Bolsonaro 44%.

Déi zwee trieden Enn Oktober an engem Ballotage géinteneen un, well kee vu béide Kandidate méi wéi 50% kritt huet.

Wie si béid Kandidaten?

Ënnert dem Bolsonaro sinn a Brasilien iwwer 680.000 Mënschen u Covid gestuerwen, d'Wirtschaft ass um Buedem, d'Inflatioun an de Chômage héich. D'Inegalitéite wiere ganz grouss, dat hält d'OECD fest.

RTL

© AFP

2018 souz de Lula wéinst Korruptioun am Prisong. D'Urteel gouf spéider annuléiert. Als President hat hie wéineg fir Ekologie iwwreg. Lo versprécht hie géint d'Ofholze vum Reebësch virzegoen. Net jidderee wielt d'Ikon vun der Aarbechterpartei aus Iwwerzeegung.

De Bolsonaro gëllt als brasilianeschen Trump, polariséiert mat rassisteschen an homophoben Aussoen. Zanter Méint scho schwätzt den Ex-Militär vu méiglechem Walbedruch. Bei senger warscheinlecher Defaite goufe Gewalt-Eskalatioune gefaart.

2 Millioune Jonker tëscht 16 an 18 Joer hu sech op d'Wielerlëscht agedroen. Esouvill wéi nach ni. Si fäerten ëm hir Zukunft. Angscht ass ee vun de Motore bei dëser Presidentschaftswal. Fir Gewaltdoten ze verhënneren, kruten d'Brasilianer dëse Weekend verbueden, mat Waffe virun d'Dier ze goen.