Aktuell ginn et staark Tensiounen tëscht Nordkorea op der enger a Südkorea, Japan an den USA op der anerer Säit.

Fir d’éischt zanter 5 Joer hat eng nordkoreanesch Mëttelstreckerakéit nees japaneschen Territoire iwwerflunn. Doduerch ass den Noutfallplang a Japan ausgeléist ginn. D'Awunner vun 2 Regioune goufen opgeruff, sech am Keller ze verstoppen. D'Rakéit ass duerno an de Pazifik gefall. De japanesche Premier Kishida huet d'Aktioun schaarf verurteelt a vun engem Gewalt-Akt geschwat.

Fir d'lescht ass 2017 eng nordkoreanesch Rakéit iwwer Japan geflunn. D'Vereenten Natioune verbidden esou Tester eigentlech. Vun Nordkorea heescht et, et wier d'Reaktioun op rezent gemeinsam Militärmanöver vun den USA mat Südkorea a Japan.

Südkorea an d'USA hu mat Militärübunge mat sougenannte Präzisiounsbomme op déi rezent Tester vun Nordkorea reagéiert. Véier südkoreanesch a véier US-amerikanesch Kampffliger waren un der Übung mat zwou satellittegesteierte Bommen am Giele Mier bedeelegt. Ausserdeem goufen e Mëttwoch eng Rei Rakéiten an d'Mier geschoss. Eng südkoreanesch Rakéit hat dobäi eng Feelfunktioun an ass kuerz nom Start ofgestierzt. Mat de Manövere wéilt ee weisen, datt d'Alliéiert mat präzisen Attacken op Provokatioune reagéiere kéinten, heescht et vun der südkoreanescher Arméi.