Zu Prag ass en Donneschdeg en historeschen Dag. Fir eng éischte Kéier kënnt nämlech op engem Sommet déi nei "europäesch politesch Gemeinschaft" beieneen.

Dobäi si méi wéi 40 Staats- a Regierungscheffe vertrueden. Nieft der EU och quasi sämtlech Nopeschlänner: D'Schwäiz, Groussbritannien, d'Tierkei, d’Westbalkan-Staaten an och d'Ukrain, am ganze 44 Länner.

Dräi Sujeten dominéieren dann op dësem neien Treffen, dat wieren den Ukrain-Krich, déi domadder verbonnen Energiekris an de Klimawandel. Wat awer genee dobäi erauskomme soll, ass ongewëss, well u sech keng Ofschloss-Deklaratioun geplangt ass.

Zil wier et haaptsächlech elo mol, sech auszetauschen a méi no ze kommen, huet et am Virfeld vun dësem Treffe geheescht. Virun allem wëll een a Richtung Russland a Belarus weisen, datt een zesummesteet. Béid Länner goufen nämlech net invitéiert.

E Freideg ass och den informellen EU-Sommet zu Prag. Fir Lëtzebuerg ass de Premier Xavier Bettel mat derbäi.