En Dënschdeg goufen am Geriichtsprozess ëm déi déidlech Schëss op zwee Polizisten zu Kusel d'Plädoyere gehalen.

Den Ufank hat hei de Parquet gemaach. De Procureur Stefan Orthen huet verlaangt, dass den Haaptugekloten
Andreas S. wéinst Mord an illegalem Joen zu enger liewenslänglecher Prisongsstrof verurteelt gëtt. Ausserdeem huet de Parquet verlaangt, dass d'Geriicht déi besonnesch Gravitéit vun der Schold feststellt. Doduerch géif praktesch ausgeschloss ginn, dass den Andreas S. fréizäiteg aus dem Prisong kéim.

Bei deem aneren Ugeklote Florian V. huet de Parquet sech dofir ausgeschwat, op eng Strof ze verzichten. Zwar hätt och hien illegal gejot, ma et misst een him zegutt halen, dass hien zu der Opklärung vun de Morde bäigedroen hat.

Den Andreas S. an de Florian W. waren Enn Januar vun der Police erwëscht ginn, wéi si mam Auto um Heemwee vun enger illegaler Juegd waren. Doropshi soll den Haaptugekloten fir d'éischt déi 24 Joer al Police-Praktikantin an dunn den 29 Joer ale Polizist mat sengem Juegdgewier erschoss hunn, déi si kontrolléiere wollten.