Déi franséisch Assemblée Nationale huet en Donneschdeg den Owend zu Paräis mat grousser Majoritéit dofir gestëmmt.

A Frankräich soll d'Recht op Ofdreiwung an d'Verfassung verankert ginn. 32 Deputéiert hunn dogéint gestëmmt an 337 dofir.

D'Resolutioun gesäit vir, fir an der Verfassung de Saz dobäizeschreiwen "D'Gesetz garantéiert d'Effektivitéit an de gerechten Zougang zum Recht op e fräiwëllege Schwangerschaftsofbroch". ("La loi garantit l'effectivité et l'égal accès au droit à l'interruption volontaire de grossesse.")

Elo muss awer nach de Senat ofstëmmen. Doropshi muss, well den Text vum Parlament an net vun der Regierung kënnt, och nach an engem landeswäite Volleksreferendum eng Majoritéit dofir stëmmen. Nëmmen da kann d'Adaptatioun an der Verfassung gemaach ginn.

Déi lénkspopulistesch Deputéiert Mathilde Panot huet et als "eng historesch Victoire fir d'Fraen a Frankräich an op der ganzer Welt" bezeechent an d'Ännerung de Fraen an den USA, Polen an Ungarn gewidmet. De Sacha Houlié, deen zu där selwechter Partei wéi den Emmanuel Macron gehéiert, huet vun engem "grousse Schrëtt" geschwat, huet awer betount, datt et "nëmmen en éischte Schrëtt" wier.