Op der italienescher Insel lafen aktuell d'Rettungsaarbechten no engem Äerdrutsch weider. Den Noutstand gouf ausgeruff.

Op der italienescher Insel Ischia waren e Méindeg de Moien nach ëmmer eng 5 Leit no engem Äerdrutsch vermësst. 7 Doudeger sinn antëscht bestätegt ginn, dorënner och een nëmmen 22 Deeg ale Puppelchen.

D'Rettungsaarbechte goufen duerch de ville Reen an de staarke Wand ausgebremst. Och eng Fär, déi Verstäerkung vum Festland sollt bréngen, fir ze hëllefen, ass wéinst dem schlechte Wieder net sou séier op d'Insel komm wéi geplangt. Et ass déi zweet Naturkatastroph an Italien bannent nëmmen e puer Méint.

Am September waren 11 Persounen an Iwwerschwemmungen ënnert anerem un der Adriaküst ëm d'Liewe komm.