Nëmmen e puer Stonnen no de Razziae géint déi presuméiert Extremiste sëtzen 8 vun de 25 Verdächtegen an Untersuchungshaft, dorënner och de Chef vum Grupp.

Den däitsche Parquet huet e Mëttwoch zu Karlsruhe matgedeelt, datt 8 vun de 25 Persounen, déi wéinst Terror-Verdacht festgeholl goufen, antëscht schonn an Untersuchungshaft sëtzen. Ënnert hinne wier och de presuméierte Chef Heinrich XIII. Prënz Reuß. Déi aner festgeholl Persounen hunn e Mëttwoch an en Donneschdeg Rendez-vous bei den Ermëttlungs-Riichter vum Bundesgeriichtshaff. Wéi et vum Procureur general, dem Peter Frank, heescht, soll sech de Grupp den Ermëttlungen no schonn am November 2021 ronderëm den Heinrich Prënz Reuß organiséiert hunn.

Fir d'däitsch Inneministesch Nancy Faeser loossen d'Ermëttlungen "an den Ofgrond vun enger terroristescher Menace aus dem Räichsbierger-Milieu blécken". Wéi wäit d'Pläng, fir de Bundestag ze stierzen, entwéckelt waren, musse weider Ermëttlunge weisen.

Police-Razzia an 11 Bundeslänner

25 Persoune goufe wéinst Terror-Verdacht festgeholl, well si Attacken op Institutioune geplangt sollen hunn.

Eng Police-Razzia an 11 Bundeslänner - dat ass net alldeeglech an Däitschland a weist d'Envergure, mat där géint Membere vum riets-terroristesche Räichsbierger-Mouvement agéiert gëtt. Duerchsicht goufen eng 130 Wunnengen, Büroen an Depoten, verhaft goufen eng 25 suspekt Leit - wat stécht hannert der spektakulärer Aktioun?

Razzia "Reichsbürger"/Reportage Roy Grotz

Mir schwätze vun der gréisster Police-Aktioun géint Extremisten, déi et bis ewell an Däitschland gouf, mat enge 50 Persounen, déi speziell am Viséier vun den Enquêteure waren, well se Member an enger terroristescher Organisatioun sinn.

Duerfir hunn e Mëttwoch an de fréie Moiesstonnen eng 3.000 Beamte simultan zougeschloen, dorënner Spezialunitéiten an d'GSG9. Nieft Aktiounen an ënnert anerem Rheinland-Pfalz, Bayern, Hessen a Sachsen goufen et och Perquisitiounen an Éisträich an Italien.

D'sougenannt "Reichsbürger" si géint d'aktuell Staatsform an Däitschland a wëllen dëse mat Waffen-Asaz ersetzen - Hannergrond vun de radikaliséierte Leit ass ënnert anerem d'Querdenker-Zeen, d'Deep-State- an d'QAnon-Ideologie.

D'Razzia geschitt elo, well d'Enquêteuren Indicen haten, datt imminent eng arméiert Attack op de Bundestag geplangt war an dobäi och sollte Politiker sequestréiert ginn.

D'Police huet duerfir decidéiert, séier ze agéieren, fir esou e geplangten, gewollte Chaos ze verhënneren a militant Aktiounen ze ënnerbannen.

Enquêteuren no ass zum Beispill och d'Riichterin Birgit Malsack-Winkemann e Member vun de Räichsbierger. Si ass AfD-Member, fréier Deputéiert a kennt sech am Gebai vum Reichstag aus, dee sollt gestiermt ginn, nom Virbild vum Kapitol zejoert.

Ënnert den Accuséierte sinn och fréier Zaldoten a suspendéiert Polizisten, grad wéi e Pilot an en Internist - geplangt war deen dobäi vun eegestännege Militärunitéiten, déi dann d'Attacke sollten duerchféieren. Dës sougenannt "Heemecht-Protektiouns-Gruppen" sollten iwwerall an Däitschland stationéiert ginn an haten och ewell Exercicë mat Waffen.

No dem geplangte Putsch haten d'Reichsbürger geplangt, den 71 Joer ale Prënz a Promoteur Heinrich Reuss un d'Spëtzt vun hirer Regierung ze setzen - dem Mann seng Frëndin Vitalia hat ewell Kontakter mat Russland geknäppt, heescht et. Den Adelegen ass elo an Untersuchungshaft.

RTL

© AFP