Dee Sechstgewielte bei de leschte Gemengewalen iwwerhëlt an Zukunft de Poste vum Buergermeeschter. D'Buergermeeschtesch vu bis elo stellt sech Froen ...

En neie Schäfferot an en neie Buergermeeschter goufen e Mëttwoch den Owend an der Gemeng Géisdref bei Wolz designéiert, datt ënnert den Ae vun enger Police-Patrull, déi op d’Plaz geruff gi war, aus Angscht virun enger méiglecher Eskalatioun.

Op där enger Säit steet den neie Buergermeeschter Jean-Paul Mathay mat sengem Entourage, dorënner Claude Gilson, Marc Keilen a Christian Flora, op der anerer Säit d’ofgewielte Buergermeeschtesch Christa Schmitz, déi vun enger ganzer Partie vun Awunner e Mëttwoch ënnerstëtzt gouf.

D’Situatioun war ugespaant an dat dierft och nach déi nächst Zäit esou bleiwen, d’Sträitpunkte sinn nämlech nach laang net op d’Säit geluecht ...

AUDIO: "Polit-Krimi" zu Géisdref: Rep. Nadine Gautier

Et ass ee Polit-Krimi, schéngt es op alle Fall, wann ee mat den eenzelen Acteure schwätzt. Do ass zum Beispill d’ofgewielte Buergermeeschtesch Christa Schmitz, déi engem Grupp aus 5 Leit, dorënner dem fréiere Buergermeeschter Norbert Maes an dem Schäffe Claude Gilson, ferme Reprochë mécht. Si schwätzt vun engem Kick, sech un d’Muecht an der Gemeng ze putschen.

Scho vun Ufank un, direkt no de Gemengewalen 2017, hätt si ugekënnegt kritt, datt am Gemengerot géint si wäert agéiert ginn, esou d’Christa Schmitz. Duerno huet sech den zweete Schäffe Claude Gilson, dee sengen Aussoe no vum Schäfferot net matagebonne gouf, dem Grupp ëm den Norbert Maes ugeschloss. Deemno ass de politeschen Equiliber gekippt.

E Mëttwoch gouf dunn den neie Buergermeeschter Jean-Paul Mathay vun deem Grupp designéiert, an enger ganz spezieller Stëmmung, esou d’Christa Schmitz. Wéi den Här Flora an den Här Keilen an d'Gemeng eragaange sinn, wiere vill Leit bei der Gemeng gewiescht. Dunn hätt den Här Flora ugefaangen, d'Leit ze filmen ... "Si mussen en immens schlecht Gewëssen hunn", esou d'Christa Schmitz am RTL-Interview. Si hätte souguer d'Police geruff a wieren no der Sitzung fortgelaf, dobäi hätten d'Leit hinne wëlle Froe stellen. Déi al Buergermeeschtesch freet sech: "Wéi wëlle si elo déi Gemeng leeden, wa si mol net am Stand sinn, de Leit an d'Aen ze kucken a mat hinnen ze kommunikéieren."

Esou, wéi dat zu Géisdref iwwert d’Bühn gaange wier, géif si traureg stëmmen, esou d’Christa Schmitz. Et wier jo och enttäuschend fir d'Leit, well dat, wat si elo hätten, wier net dat, wat si gewielt hätten - déi wollten den Ex-Buergermeeschter mat senger Ekipp net méi an hunn en elo awer nees ...

Schonn am Dezember hat e Grupp aus 4 Gemengeconseilleren, dorënner de fréiere Buergermeeschter Norbert Maes an den deemools zweete Schäffe Claude Gilson, e Mësstrauensvott géint de Schäfferot an d'Buergermeeschtesch Christa Schmitz gestallt. Dee krut am Dezember déi néideg Majoritéit.

Zanter e Mëttwoch den Owend ass dann elo zu Géisdref en neie Buergermeeschter um Rudder: de Jean-Paul Mathay, Sechstgewielte bei de leschte Gemengewalen. Neien éischte Schäffe gëtt de Claude Gilson an den zweeten de Marc Keilen.

E Mëttwoch den Owend hat sech och d'Christa Schmitz opgesat, fir fir hire Posten ze kandidéieren an dësen also ze verdeedegen, ma si hat net méi genuch Leit, déi hir de Réck gestäipt hunn. Et stoung 5 zu 4 fir déi nei Gemengeconstellatioun.

Den éischte Schäffe vu bis elo, de Marc Siebenaller, konnt säi Posten deemno och net halen.

Den neie Buergermeeschter Jean-Paul Mathay huet en Donneschdeg de Moien aus Zäitgrënn net konnten op d’Lag zu Géisdref reagéieren.