Op der Theaterplaz wäert vu Mëtt Juli bis September eng Plage entstoen, dat hunn d'Gemengeresponsabel e Mëttwoch de Moien um City Breakfast matgedeelt.

D'Theater-Plage, eng nei Beliichtung fir d’Plëss, e Food-Village op der Place Guillaume II a kleng Schëffelcher am Parc Merl. Dat waren ënnert anerem d’Themen, déi de Stater Gemengerot de Mëttwoch de Moien am City Breakfast presentéiert huet.

AUDIO: City Breakfast/Reportage Danielle Goergen

Mat engem Sandberäich, engem Piano, e puer Chaisec longues a Sonneprabbelie soll aus der Theater-Plaz vu Mëtt Juli bis September eng Plage gemaach ginn. Dëse Projet ass nëmmen ee vu villen, fir d’Stad iwwer de Summer méi attraktiv ze maachen, esou de Serge Wilmes: "Fir dëst Joer hu mir och decidéiert gehat, datt mir géifen elo all Joer eng Configuratioun maache fir de Summer an eng fir de Wanter. Eben an der Suite dovunner wäerte mir am Märeler Park och erëm dëst Joer - wat mir d’lescht Joer och fir d’éischt haten - nees déi kleng Schëffelcher zu Locatioun do gi fir Kanner, fir Grousser a Klenger."

Vun August u soll, fir méi Liewen op de Maart ze bréngen, och all Mëttwoch e klenge "Food-village" op de Knuedler kommen. Bis Oktober ass dëse mol geplangt, ma wann en gutt ukënnt, géing een et awer gäre bäibehalen. Op der Place d’Armes gëtt dëse Freideg um 22.30 Auer eng nei Light-show lancéiert, esou de Patrick Goldschmidt.

"Elo hu mir eng Opportunitéit kritt vun enger Start-Up am Ausland, déi eis d’Méiglechkeet ginn huet, fir 40.000 Liichtpunkten, also esou LED-Luuchten op 17 Beem festzemaachen, déi a verschiddene Faarwe kënne gespillt gi mat engem Computer."

Dës Luuchte solle bei spezielle Geleeënheete wéi Nationalfeierdag benotzt ginn.

Rieds goung och vun der Eechepressessiounsraup. Dës war jo d'lescht Joer schonns eng Plo, ma et goufe scho ronn 290 Näschter ewechgemaach, esou den Serge Wilmes.

"Bei de Servicer, deene Concernéierten, dem Park, respectif dem Patrimoine Naturelle wäerte mir eis Communicatioun verbesseren an op déi Plazen an Zukunft esou ee Plakat ophänken. Da wëssen d’Leit, ëm wat et sech do handelt - mat den Informatiounen – Beift eweg a mellt et w.e.g bei eise Servicer, déi wäerten da sur Place kommen an dat ewechmaachen."

Nei ass och, datt et de Site vun der Stater Gemeng elo op 3 Sprooche gëtt. Déi verschidden Donnéeë fënnt een elo op Franséisch, Däitsch an Englesch. 4.500 Säiten hu missen iwwersat ginn. Ob Lëtzebuergesch dobäi kéim, wéisst een awer nach net.

De weideren Ausbau vum Tram-Chantier iwwert d’Summervakanz.  Dat war och en Thema.  Vun Ufank Juli bis an den Hierscht soll vill geschéien. D'Stater Buergermeeschtesch Lydie Polfer ass dann och glécklech driwwer, datt een heivir d'Autorisatioun an de Summerméint krut.

AUDIO: Extrait Lydie Polfer

Den Tram soll jo vun der Stäreplaz bis weider op d’Gare fueren.  Am Juli ginn d’Aarbechten un, am September ass dann de Quartier Gare un der Rei.  Et dierft een de Leit awer net d’Gefill ginn, datt si d’Gare evitéiere missten, esou de Serge Wilmes.