D'Gemeng Käerjeng hat e Freideg virun enger Arnaque gewarnt. E Méindeg gouf richteg gestallt, datt eng Initiativ dohannert stécht.

Questionnaire zu Käerjeng / De Reportage vum Pierre Jans

De Questionnaire ass aus enger Initiativ ënner Noperen entstanen, déi selwer vum Tornado betraff sinn. De Froebou wier e Moyen, fir d'Situatioun vun den eenzele Leit besser z'erfaassen a fir drop hinzeweisen, datt nach ëmmer Betraffener, och 4 Méint no der Katastroph, nach Problemer hätten.

Donieft hätt och net all Mënsch kënnen un de Reunioune vun der Gemeng deel huelen an esou kriten och dës Leit Gehéier, zum Beispill eeler Persounen.

Et wär eng kollektiv Demarche, déi de Punkt iwwer déi kritesch Situatioun vu ville Concernéierte maache soll. Dat huet ee vun de Signatairen, den Eric Sassel, e Méindeg de Moien RTL géintiwwer erkläert.

D'Gemeng hat e Freideg gewarnt, datt falsch Dokumenter an der Gemeng géingen zirkuléieren. 2 Frae géinge bei d'Leit schelle goen an Dokumenter verdeelen. D'Zil wier et, fir Informatiounen ze sammelen iwwer Tornado-Schied an och iwwer Donen.

Falsch Dokumenter

Vun der Gemeng Käerjeng hat et geheescht, d'Dokumenter wieren net offiziell an d'Bierger sollte keng Froe beäntweren.

D'Gemeng huet och annoncéiert, an den nächsten Deeg hirersäits Ziedelen ze verdeele mat Informatiounen iwwer d'Prozeduren, wat eventuell finanziell Hëllefe fir Tornado-Affer ugeet.

Domat hätt d'Initiativ hiert Zil schonn deels areecht, esou nach den Eric Sassel, fréiere Gemengeconseiller vun der LSAP.