An der Gemeng Monnerech ginn et Changementer am Schäfferot an am Gemengerot.

D’Nancy Arendt vun der CSV an de Jean Kihn vun der DP hunn um Freideg de Mëtteg hire Récktrëtt bekannt gemaach.

Op Nofro hin, huet d’Nancy Arendt virun allem de Cumul vun de Mandater als Grond fir hire Récktrëtt genannt. Ënnert anerem ass si Presidentin vun der Petitiounskommissioun a vu „Monnerech hëlleft“.

Nancy Kemp-Arendt: "Dir wësst, ech sinn Deputéiert an der Chamber an ech si Presidentin vun der Petitiounskommissioun, wat extrem vill Aarbecht ass. Ech sinn och nach am Nato-Parlament, am Syndikat Pimodi, "Monnerech hëlleft", dat si ganz vill Missiounen, déi ech do zesummen hunn an dat si ganz vill Datumer, déi sech do iwwerschneiden. An ech sinn eben esou wéi ech sinn, ech kann dat net ganz richteg dann alles zesumme maachen. An da fannen ech, et ass besser, et léisst een engem Aneren eng Chance. Mir hunn do 2 villverspriechend Kandidaten hannendrun, déi ganz engagéiert sinn a wou et gutt wier, wa se ee politescht Sprangbriet géinge kréien. Dann hunn ech besser, ech zéie mech zeréck a ginn deenen déi Chance."

AUDIO: Nancy Kemp-Arendt

Ausserdeem wier si mat der Logementspolitik zu Monnerech net zefridden. Et géing ze vill zougebaut ginn a si kéint dat net méi matdroen.

Nancy Kemp-Arendt: "Ech wëll Iech awer och net verstoppen, dass et awer och eng Rei Divergenze ginn, ënnert anerem, wéi Monnerech sech soll weider entwéckelen. Ech hu mech ëmmer dofir agesat, Monnerech ass eng ganz ländlech Gemeng, an ech weess och, dass mer wuesse mussen, dat ass normal. Do, wou et Sënn mécht, an hei sinn awer elo och grouss Projeten annoncéiert ginn, wou ech alt oft hu misse matstëmme mat der Fauscht an der Täsch. An dee wou mech kennt, weess, dass ech net einfach nëmme matstëmme fir matzestëmmen, mä aus Iwwerzeegung dat muss maachen. An wann dat net méi de Fall ass, da sinn ech keent, wat u Poste klieft, mä éischter mech gären zeréckzitt an anere Kandidaten an och der Partei net wëll schiedegen, mä da sollen aner Kandidaten a menger Plaz do weiderfueren."

AUDIO: Nancy Kemp-Arendt Deel 2

De Monnerecher Buergermeeschter Jeannot Fürpass vun der CSV betount, dass de Schäfferot an der Linn vum Koalitiounsaccord wier. Hie gesäit d'Divergenzen am Schäfferot awer net als Grond fir de Récktrëtt:

Jeannot Fürpass: "Ech kann net soen, dass ech dat net festgestallt hunn, da misst ech elo hei leien. Et ass awer net, dass dat elo esou oniwwerbréckbar gewiescht wier, oder dass een seet, dat géing an déi falsch Richtung goen, guer net! Wéi gesot, ech gesinn hei iwwerhaapt keen Rass tëscht den zwee Koalitiounspartner, der CSV an der DP. Mir si ganz op der Linn vun deem, wat mer eis virgeholl hunn. Mir hunn ganz intensiv an haart dorunner geschafft a mir versichen, dat weider ze féieren."

Souwuel d’Nancy Arendt, wéi och de Jean Kihn triede fir den 1. Januar zeréck.

Fir den DP-Mann Jean Kihn réckelt de Marc Schramer als Gemengeconseiller no an de Serge Gaspar als Schäffen. Den Informatioune vum Lëtzebuerger Wort no wäert bei der CSV de Michel Martins de Sousa d'Nancy Arendt am Gemengerot ersetzen. De Claude Clemes huet e Freideg den Owend confirméiert, dass hien de Posten als Schäffen iwwerhuele wäert.