A Ronn 3.800 Betriber mat méi wéi 15 Mataarbechter waren d'Salariéen opgeruff, hir Personaldelegatiounen ze wielen.

Iwwer 520.000 Salariéeën waren opgeruff, hir Stëmm ofzeginn. Bal 19.000 Kandidaten op iwwer 800 Lëschten hate sech opgesat.

D'Resultater kommen nëmme ganz lues era gedrëpst. Um Donneschdeg de Moie kann een awer soen, dass, wat déi zwou gréisste Gewerkschaften uginn, den OGBL ganz kloer d'Nues vir huet. Bis ewell hunn 2.328 Betriber hir Resultater iwwert d'ITM public gemaach. Fir den Onofhängege Gewerkschaftsbond goufe bis en Donneschdeg de Moien 1.756 Kandidaten an d'Personaldelegatioune vun hire respektive Betriber gewielt a kënnt domat op 25,53%. Dobäi kommen 1.576 Délégués suppléants. Den OGBL hat am ganzen 5.200 Kandidaten an d'Course geschéckt.

Den LCGB kënnt um Site vun der ITM um Donneschdeg de Moien 10.30 Auer op 1051 Delegéiert, déi de Sprong direkt an hir respektiv Personalvertriedunge gepackt hunn. Si maachen 15,28% aus. Dobäi komme 950 Délégués suppléants. 3.750 Kandidate ware fir den Chrëschtleche Gewerkschaftsbond ugetrueden.

Den LCGB selwer schreift an engem Communiqué um Donneschdeg de Moien, dass déi definitiv Zuele bekannt wieren. Deemno kéim den LCGB op 1.165 effektiv Mandater an op 1.138 Délégués suppléants.

D'Bankegewerkschaft Aleba kënnt um Donneschdeg de Moien op 278 Effektiver, de Landesverband op 16.
Aner Gruppementer vu Salariéeën, déi an de Betriber ugetruede sinn, kommen op iwwer 3.000 Delegéiert. 
Bei de Sozialwahlen an der Stad Lëtzebuerg krut de neutrale Verband mat 9 Mandater déi meeschte Stëmmen. LCGB an FGFC kommen op 3 Mandatairen, den OGBL op 2.

Gekuckt iwwert déi eenzel Secteuren an deene gewielt gouf, kann ee wat d'Industrie ubelaangt festhalen, dass den OGBL hei vir läit, mat am Moment 279 Delegéierten. Den LCGB kënnt op 171.

Och am Bausecteur konnt sech den OGBL kloer duerchsetzen, mat aktuell 220 Kandidaten, déi et direkt gepackt hunn. Den LCGB kënnt op hei op 149 Delegéiert.

Am Commerce huet den OGBL d'Nues vir, mat aktuell 202 Delegéierten géintiwwer 164 fir den LCGB.

Am Transportsecteur huet de Chrëschtleche Gewerkschaftsbond den Ament d'Nues vir mat 131, géintiwwer 104 fir den OGBL.

Anescht dogéint presentéiert sech d'Bild am Gesondheets- a Sozialsecteur, wou den OGBL däitlech vir läit mat iwwer 339 Delegéiert. Hei kënnt den LCGB op 68 Effektiver, déi direkt era gewielt goufen.

Am Finanzsecteur kënnt d'Aleba aktuell op 247 Kandidaten, déi direkt an d'Personaldelegatioune gewielt goufen. Hei kënnt den Onofhängege Gewerkschaftsbond op 143 Delegéiert an den LCGB op 110. Aner Gruppementer vu Salariéen si mat 341 Delegéiert an de Personaldelegatiounen am Finanzsecteur vertrueden.

Enseignement supérieur et Recherche (OGBL est le seul syndicat à être encore représenté dans ce secteur):

Université du Luxembourg: 16 délégués effectifs sur 16

Bâtiment:

CDCL : 9 délégués élus sur 9

SOLUDEC: 8 délégués effectifs sur 8

Santé et soins:

Centre hospitalier du Nord: 14 délégués effectif sur 14

CHEM : 13 délégués élus sur 16

Stëftung Hellef Doheem : 14 délégués effectifs sur 16 (+1 pour OGBL / - 1 pour le LCGB)

Energie:

Encevo: 9 délégués effectifs sur 14 (plus grosse entreprise dans le secteur de l'Energie - OGBL prend la majorité au LCGB - avant élections: rapport de forces 5/7 pour le LCGB

Commerce:

Cactus: 16 délégués effectifs sur 20

Auchan: 12 délégués effectifs sur 13

Services publics:

Administration des Ponts et Chaussées: 9 délégués effectifs sur 10

Dat alles sinn den Ament just provisoresch Resultater. Déi definitiv dierften eréischt am Laf vum Dag virleien. Virun allem déi grouss Entreprisen am Land hunn nach keng Resultater bei der ITM eragereecht.

Reaktiounen

D'Nora Back war an der Nuecht op e Mëttwoch eng ganz zefridde Generalsekretärin vum OGBL. An hiren Aen hunn d'Zuele vun de gewielte Personaldelegéierte fir sech geschwat an et war och eng gutt Stëmmung an der Maison du Peuple zu Esch.

AUDIO: D'Nora Back

An der Haaptsaach sot sech d'Nora Back zefridde mam Resultat am Gesondheets- a Fleegesecteur, an deem d'Majoritéit vum Onofhängege Gewerkschaftsbond gestäerkt gi wär. Deem seng Generalsekretärin huet vun enger Unerkennung fir den Asaz vun den OGBL-Leit um Terrain geschwat: Fir d'éischt hätt et de Succès vum Kollektivvertrag ginn, du wär et zur grousser Manifestatioun mat iwwer 10.000 Leit an der Stad komm an um Enn zum Streik a verschiddene Fleegeheimer. Alles dat hätt zu aneren Aarbechtskonditioune fir d'Leit aus deem Secteur gefouert.

Beim Lancement, am Januar, vun der Campagne fir d'Sozialwalen, hat den André Roeltgen op eng Victoire vu senger Gewerkschaft gehofft. Generell hätt een de Succès, deen ee wollt hunn, sou den OGBL-President um Mëttwoch de Moien 1 Auer um RTL-Mikro.

AUDIO: Den André Roeltgen iwwert d'Resultat

Virun zwee Méint hat den André Roeltgen dovu geschwat, dass dës Sozialwalen eng Signalwierkung net nëmme fir d'Gewerkschaften, mä och fir d'Politik hätten. Dat géifen déi éischt Resultater dann och beleeën.

AUDIO: Den André Roeltgen

Fir d'Resultat vun der Chambre des Salariés muss ee sech jo nach gedëllegen. Huet den OGBL-President dann Hoffnung op en ähnlecht Resultat do wéi bei de Wale fir d'Personaldelegéiert? Do war d'Äntwert kloer, dass een, egal wéi, zouversiichtlech wier, dass een déi absolut Majoritéit géif behalen.

AUDIO: Den André Roeltgen ass zouversiichtlech

Den LCGB kënnt aktuell, hire leschte Chifferen no, op ronn 860 Delegéiert, déi de Sprong direkt an hir respektiv Personalvertriedunge gepackt hunn. De Gewerkschaftspresident Patrick Dury huet sech de Moien am RTL Interview an enger éischter Reaktioun net onzefridden iwwert dat Resultat gewisen.
Et géifen eng helle Wull Beräicher ginn, wou een bei de Personaldelegatiounen hätt kënnen zouleeën.

AUDIO: De Patrick Dury

Fir de Patrick Dury wieren déi Resultater awer besser ausgefall, wéi erwaart.
An deem Sënn huet hien sech och virsiichteg optimistesch gewisen, wat d'Sëtz -Mandater an der CSL uginn. Bis déi gewosst sinn, musse mer eis awer nach e bësse gedëllegen.

AUDIO: De kompletten Intervuew mam Patrick Dury (LCGB)

D’Aleba ass no de Sozialwalen zefridden, heescht et bei der Bankegewerkschaft. Nach feelen eng ganz Partie Resultater vu grousse Banken, wéi der BIL, der KBL oder och nach der Société générale Bank and Trust. Och méi kleng Banken hätten der Aleba nach keng Resultater matgedeelt. D’BGL dogéint koum e Mëttwoch viru Mëtteg eran. Do hätt sech näischt par Rapport zu 2013 verännert, do bleift den LCGB vir. Am generelle kéint ee soen, datt d’Aleba d’selwecht bliwwe wier, wéi viru 6 Joer, wann se bei Banken Sëtz verluer hätt, wieren déi duerch Sëtz an aneren Instituter nees dobäi komm, huet et bei der Bankegewerkschaft op Nofro hin erkläert.

Sozialwalen um Dënschdeg de Mëtteg

Parallel gouf och eng nei Chambre des Salariés gewielt. Bis en Dënschdeg konnten iwwer 500.000 Salariéen a Pensionéierter hir Stëmm via Bréifwal ofginn. Bei dës Walen waren och Frontalieren zougelooss. Fir déi 60 Mandater hate sech 264 Kandidaten vun de Gewerkschaften OGBL, LCGB, Aleba, FGFC, Landesverband a Syprolux opgesat.

Bei de leschte Sozialwalen am Joer 2013 koum den Onofhängege Gewerkschaftsbond op 38 Sëtz, de Chrëschtleche Gewerkschaftsbond op 15 Mandater an d'Bankegewerkschaft Aleba op 4. De Landesverband war mat 2 Memberen an der Chambre des Salariés vertrueden an de Syprolux mat engem.

Op enger Pressekonferenz Enn Januar hat den Aarbechtsminister Dan Kersch een Abléck ginn, wéi d'Walprozedur an deenen eenzelen Betriber genee ofleeft. Et leeft iwwer eng digitaliséierten Organisatiounsprozess, wat et de Betriber wesentlech méi einfach wäert maachen. All Betrib huet en Accèscode kritt, fir op Myguichet.lu d'Walen z'organiséieren.

AUDIO: Den Dan Kersch

Dat erméiglecht och, dass d'Auszielunge vill méi séier ginn an d'Resultater domat och méi séier disponibel sinn.

Wéi d'Sozialwalen fir d'Chambre des Salariés ausgaange sinn, dierft eréischt an den nächsten Deeg ëmmer méi däitlech ginn. Déi éischt Resultater komme wuel den Owend eraus. An den nächsten Deeg gi mer dann gewuer, wien et aus wéi enge Gruppen an d'CSL gepackt huet.

Dee gréisste Grupp ass dee vum Déngschtleeschtungssecteur mat am ganze 14 Sëtz. Hannendru kommen den Industrie- an de Finanzsecteur mat allkéiers 8 Mandater. De Gesondheets- a Sozialsecteur, d'Bauwiesen, an d'Pensionéierter hunn allkéiers 6 Sëtz, d'Eisen- a Stolindustrie ass mat 5 Leit an der Chambre des Salariés vertrueden, véier Sëtz sinn fir Administratiounen an ëffentlech Entreprisen an déi national Eisebunnsgesellschaft kënnt op 3 Mandater.