Ma och Innovatioun a Kreativitéit ginn op den eenzele Stänn an de Foireshalen um Kierchbierg groussgeschriwwen.

Pünktlech fir den Ufank vum Fréijoer ass an der Luxexpo um Kierchbierg nees Springbreak ugesot. Dëst Joer stinn déi 5 Deeg a 5 Owender ganz am Kader vun der Innovatioun, der Kreativitéit an dem positiven Impakt.

Dem Mëttelstand- & Tourismusminister Lex Delles no wéilt een dëst Joer och deene méi klengen innovativen Entreprisen zu Lëtzebuerg d'Méiglechkeet ginn, sech ze presentéieren.

An Zukunft soll sech de Support nach verbesseren. Et wéilt ee Leit, déi manner Chance mat enger Entreprise haten a faillite erkläert hunn, ënner verschidde Konditiounen eng nei Chance bidden.

Lëtzebuerg wier en intressante Standpunkt, net nëmme fir déi Grouss vun hannert der Grenz, ma och lokal Start-Up-Entreprise géife profitéieren.

Och de Lëtzebuerger Tourismus wier dëst Joer gutt op der fréierer Fréijoersfoire vertrueden.

Lex Delles:Also et ass jo fir déi éischte Kéier, datt de Lëtzebuerger Tourismusministère beim Springbreak dobäi ass. Mir schwätzen hei vun Nohaltegkeet, Nohaltegkeet ass och am Tourismus, wou mer déi éischte Kéier e Stand hunn hei op der Foire... wou mer Lëtzebuerg weisen. Lëtzebuerg mat all senge Facetten duerch déi verschidde regional Tourismus-Büroen. Zesumme mat de lokale Produzenten. Déi och hier Produite bei eis um Stand hunn.“

Am Mëttelpunkt vun der Foire stinn ewéi ëmmer eng ganz Rëtsch Evenementer a gastronomesch ewéi kulinaresch Produiten. Nach bis e Sonndeg ass de Springbreak um Kierchbierg op.

Télé-Reportage a Fotogalerie

D'Fabienne Zwally war den Donneschdeg de Mëtteg scho fir eis op d'Springbreak op d'Sich no Nouveautéiten. A fonnt huet et nieft VR-Technologie och en neiaartege Mini-Scooter an eng nohalteg Aart a Weis, fir Geméis unzeplanzen.

VIDEO: Springbreak 2019
Bis e Sonndeg ass de Motto hei "Nohaltegkeet". Ma och Innovatioun a Kreativitéit ginn op den eenzele Stänn groussgeschriwwen.

Eise Fotograf Paul Theisen war och bei der Ouverture dobäi an huet e puer flott Impressioune matbruecht.