Wéi soll Esch an Zukunft wuessen? Den neie Bebauungsplang ass an der Prozedur. Um Donneschdegowend war eng Biergerversammlung an der Gemeng zu Esch.

AUDIO: Escher PAG: De Reportage vum Pierre Weimerskirch

Nom éischte Vott am Gemengerot sinn et elo d’Bierger, déi d’Méiglechkeet kréie Reklamatiounen eran ze ginn. En Donneschdeg hunn op enger Biergerversammlung ronn 50 Leit Deel geholl. Den neien Escher PAG wier keng Revolutioun, ma wier méi iwwersiichtlech a méi konkret, esou déi Responsabel vun der Gemeng Esch. Knapp 10 Joer gouf um Bebauungsplang geschafft, wou d’Bierger elo bis den 9. Abrëll Zäit hunn, hir Bemierkungen a Reklamatiounen ofzeginn. Op der Biergerversammlung ware wéi gesot knapp 50 Leit.

2018 hat di zweet gréisste Stad vum Land 36'000 Awunner. Géif de PAG voll ausgenotzt, kéint een op 50'000 Awunner wuessen. Esch hätt en enormt Entwécklungspotenzial, esou d’Urbanistin vun der Stad Esch Daisy Wagner. Wat kuerzfristeg ëmsetzbar ass, eleng domat kéim ee schonn op iwwer 40'000 Awunner, ouni dass de PAG nei Surfacen misst ausweisen. Dobäi kommen dann déi méi laangfristeg Potentialer a Form vun de klassesche groussen Industriefrichen, déi entwéckelt musse ginn.

2050 kéint een op 65'000 wuessen, esou den Escher Buergermeeschter. Dëst wier quasi eng Verduebelung. De Georges Mischo erkläert, dass dat enorm ass, an dass do och d'Perspektive ronderëm mussen ugepasst ginn, sief et Reseauen, Mobilitéit, Infrastrukturen asw.

Bis den 9. Abrëll kënnen d’Bierger hier Kommentaren zum PAG ofginn.

PAG - kuerz erkläert

De Plan d'aménagement général ass een Dokument, dat zu Lëtzebuerg all d'Gemengen ausschaffe mussen. Et schreift vir, wéi den Territoire sech dierf entwécklen. De PAG reegelt ënnert anerem, wéi dierf gebaut ginn, wéi d'Landschaft sech entwéckelt, kläert Froe vu Mobilitéit an och wéi eng Gebailechkeeten ënner Denkmalschutz gesat ginn.