Accident um Freidegmoie kuerz no 2 Auer op der Tréierer Autobunn Direktioun Gaasperecher Kräiz, op der Héicht vun der Sortie Sandweiler.

Automobilisten haten der Police ee Camion mat auslännesche Placke gemellt, deen am Rondpoint Irgäertchen de falsche Wee op d'Autobunn erop gefuer war.

De Camionschauffer huet dat kuerz drop gemierkt a wollt dunn op der Autobunn d'Kéier maachen.

En Automobilist, dee vun Tréier erfort koum huet de Camion, den hannert dem Tunnel Cents queesch an der Strooss stoung, net mat Zäite gesinn a krut den hënneschten Deel vum Camion ze paken.

De Chauffeur vum Auto koum mat Blessuren an d'Spidol.

D'Autobunn hat wéinst de Rettungs- an Opraumaarbechten musse fir eng Stonn gespaart ginn. Dono ass de Verkéier iwwert eng Spuer gelaf. Géint 4 Auer goung d'Autobunn dunn nees ganz fir den Trafic op.

Weider Accidenter

Zwee Blesséierter gouf et an engem Accident kuerz viru 18 Auer tëscht Iechternach an der Weilerbaach. Zwee Ween waren hei net laanschtenee komm.

An op der A13 tëscht Schengen a Munneref ware kuerz no 17.30 Auer och zwee Autoen aneneegerannt. Hei gouf eng Persoun blesséiert.