De groussen Interview vum "politesche Mëttwoch" op RTL Télé Lëtzebuerg elo am Replay op RTL.lu.

D'Thema an der Emissioun e Mëttwoch den Owend nom Journal op RTL Télé Lëtzebuerg war de Beruff vum Infirmier. Invitéeën am Studio waren d'Anne-Marie Hanff, Generalsekretärin vun der Anil, der Association Nationale des Infirmières et Infirmiers Luxembourgeois, an d'Monique Birkel, Directrice des soins am CHL.

AUDIO: De Beruff vum Infirmier: Rep. Lynn Cruchten

Ëmmer manner Jonker schénge sech fir de Beruff vum Infirmier z'intresséieren. D'Zuel vun den Aschreiwungen am 1. Joer vun der respektiver Ausbildung hei zu Lëtzebuerg am Lycée technique pour professions de santé (LTPS) hëlt jiddefalls of.

Dobäi hunn elo scho vun de 7.000 Infirmieren an Infirmièren, déi hei am Land schaffen, nëmmen 10% e Lëtzebuerger Infirmiersdiplom. Déi aner 90% hunn entspriechend Studien am Ausland gemaach an doduerch op d'mannst e Bachelor-Diplom an der Täsch.

Zu Lëtzebuerg baséiert d'Formatioun op enger 2e a 1ère an engem BTS-Studium vu just zwee Joer, obwuel zënter Jore gefuerdert gëtt, dass d'Ausbildung komplett an de Superieur kënnt.

"Ee vun de Grënn ass de Budget", sot am Interview d'Monique Birkel, Directrice des soins am CHL. "Jidderee fäert, da géife Revendications salariales hannendru kommen an da géif et méi deier ginn, d'Fleeg zu Lëtzebuerg", esou d'Ausso.

Den LTPS ass allerdéngs och nach mat anere Problemer konfrontéiert. E Manktem un Enseignanten am Gesondheetssecteur féiert dozou, dass den Encadrement vun de Schüler a Studenten am praktesche Stage net richteg ka garantéiert ginn, dofir muss op sougenannt "Infirmiers-Tuteurs" zréckgegraff ginn.

Dat bedeit allerdéngs nees, dass déi alldeeglech Aarbecht vun dëse beruffstätegen Infirmieren zäitweis ze kuerz kënnt an doduerch Stress an de Gesondheets- an an de Fleegeetablissementer opkënnt.

Allgemeng gëtt et och e Manktem un Infirmieren an Infirmièren hei am Land. Leit vum Terrain wënsche sech dofir, dass de Personalschlëssel emol iwwerduecht gëtt.

Vun den Invitéeën am RTL-Studio war et d'Fuerderung un d'Politik, e "Plan national pour la promotion des infirmiers et infirmières au Luxembourg" auszeschaffen an datt net um Wëssen a bei de Kompetenze gespuert gëtt.