Eng RTL-Ekipp war eng Nuecht am Escher Spidol. Ëm déi 100 Leit goufen an där Zäit vun den Infirmières- an Dokteschekippen ënnersicht a behandelt.

"Ech hu stonnelaang an der Urgence misse waarden!" Déi Kritik héiert een dacks.

Dass d'Urgencë vun eise Spideeler mat Momenter iwwerlaf sinn, ass e Fakt, woubäi d'Definitioun vun deem, wat en Noutfall ass, natierlech och relativ ass.

Wei haart ass d'Aarbecht an dat, wat een erlieft, an esou engem Urgence-Service?

Am ganze Land ginn aktuell nach 4 Urgencen déi 7 Deeg op 7 a 24 Stonnen op 24 fonctionnéieren. Dat am CHL am Spidol um Kierchbierg am Nordspidol zu Ettelbréck an am Escher Spidol. Op dʼparlamentaresch Fro vun den Deputéierte Gast Gyberien a Marc Georgen huet de Gesondheetsminister rezent geäntwert, datt et aktuell an der Moyenne tëscht 40 a 90 Minutten dauert vum Triage, bis zum Moment wou de Patient en Dokter gesäit.

D'lescht Joer sinn 90 000 Patienten an der Urgence zu Esch behandelt ginn, dat sinn der bal 250 pro Dag.

Eng RTL-Ekipp huet den Alldag an der Urgence an der Nuecht op den Donneschdeg, 21. Mäerz materlieft an dokumentéiert.