"Mir sinn an enger Kris, an enger Klima- a Biodiversitéitskris", sou de Mouvement Écologique e Samschdeg op hirem Kongress.

A wie setzt sech fir de Klimaschutz an? De Mouvement lueft déi Jonk a kritiséiert d'Politik. Déi Jonk hätten d’Klimakris erkannt a kréie fir hir rezent Manifestatioun eng "Bonne Note" vum Mouvement Écologique. Si géife sech seriö fir de Planéit engagéieren. D’Presidentin vum Mouvement, d'Blanche Weber betount, dass et keng méi normal a banal Fuerderung géif ginn. D'Fuerderung, fir op de Planéit opzepassen, dass och déi, déi haut jonk sinn, spéider normal um Planéit liewe kënnen.

AUDIO: Mouvement Écologique/Reportage Anne-Sophie Heck

Duerno gouf et awer virop Kritik, an zwar un der Politik. Fir d’éischt un der CSV-Fraktiounspresidentin Martine Hansen, dat fir hir kritesch Reaktioun op d’Iddi vum LSAP-Parteipresident Franz Fayot, deen d'SUVe méi besteiere wëll.

Och d’Regierung a generell d’Politik kéint méi maachen. Et hätt een nach ëmmer keng nohalteg Steierreform an déi haiteg Situatioun a Punkto Klimaschutz wier ee grousse Widdersproch.

De Mouvement freet konkret Mesuren a Propose fir de Klimaschutz, och vun de Parteie fir d'Europawalen. Europa misst sech d’Fro stellen, ob ee méi Wuesstem a Globaliséierung wéilt oder méi Nohaltegkeet a Klimaschutz.