D'Initiativ kënnt vun der Grande-Duchesse Maria Teresa, déi och am Virfeld bei eis op der Antenn war, fir iwwert de Sujet ze schwätzen.

En Dënschdeg fänkt am European Convention Center um Kierchbierg de Forum "Stand Speak Rise Up" un, bei deem et ëm sexuell Gewalt géintiwwer Fraen a Krichsgebidder oder soss sensibele Plazen op der Welt geet, do wou Vergewaltegung souzesoen als Waff benotzt gëtt.

© Domingos Oliveira (RTL)

D'Initiativ kënnt vun der Grande-Duchesse Maria Teresa, déi fir déi zwee Deeg mam Dr. Denis Mukwege, dem Nadia Murad an dem Professer Mohammad Yunus gläich dräi Friddens-Nobelpräis-Laureaten invitéiert huet.

© Domingos Oliveira (RTL)

Nieft enger Rei nationalen an internationalen Experten sinn awer och betraffe Fraen um Forum, déi hir Geschicht erziele kënnen an hir Froe stellen. Et ass eng Thematik, déi ëmmer nach aktuell ass, awer och ëmmer verdrängt gëtt, esou d'Grande-Duchesse bei eis am Interview lescht Woch.

AUDIO: Grande-Duchesse Maria Teresa

Nieft enger Rei vu Workshoppen, Konferenzen a Gespréicher wäert och eng informatesch Applikatioun virgestallt ginn, déi vun der ONG "We are not weapons of war" lancéiert a getest gouf an iwwer déi Betraffener sech kënne mellen, wa se Affer vu sexueller Gewalt goufen. Dës App gouf zu Lëtzebuerg entwéckelt.

AUDIO: App "BackUp"/Reportage Christiane Kremer

Si heescht BackUp a funktionéiert net wéi eng klassesch App, méi wéi eng mobil Web-Site. Dat ass eng kleng méi wichteg Nuance, wéi déi franséisch Juristin Céline Bardet preziséiert, déi schonn op ville Plazen an der Welt am Asaz war, fir Fraen ze hëllefen. Et wier eng Fro vu Sécherheet.

D'Céline Bardet huet dës Applikatioun zesumme mat hirer ONG "We are no weapons of war" an Optrag ginn an ënner anerem an de leschte Méint a Libyen getest. De BackUp huet zwou Funktiounen. En Affer kann iwwer e mobille Support eng Infraktioun mellen a gëtt dann automatesch identifizéiert. Si géingen dann eng Alerten "en temps réel" kréien.

Déi zweet Funktioun vu BackUp ass et, datt all Informatiounen, déi vun Affer oder Drëttpersoune geschéckt ginn, an enger Cloud gespäichert ginn.

D'App ass zu Lëtzebuerg bei INTEC entwéckelt ginn a soll dann och elo um Forum offiziell virgestallt ginn. Fir d'Grande-Duchesse Maria Teresa, d'Initiatrice vum Forum, soll dës Funktioun awer an Zukunft net nëmmen a Krichsgebidder gebraucht ginn.

D'Emissioun Kloertext op RTL Télé Lëtzebuerg steet e Mëttwoch den Owend am Zeeche vun dëser Thematik.