Op der Plëss kann ee sech e Freideg an e Samschdeg e Bild dovu maachen, wat de Grand-Duché un touristeschen Aktivitéiten ze bidden huet.

Zanter fënnef Joer gëtt den "Explore Luxembourg"-Evenement organiséiert. Hei kritt een Informatiounen zu Wanderweeër, Vëlostier, Muséeën – jee, allem, wat een als Tourist zu Lëtzebuerg kéint interesséieren.

Lancéiert gouf den „Explore Luxembourg“ e Freideg de Moie vum Tourismusminister Lex Delles (DP), der Stater Buergermeeschtesch Lydie Polfer (DP) an dem President vum LCTO a Stater LSAP-Conseiller Marc Angel.

Déi dräi Politiker hunn ënnerstrach, datt och d'Lëtzebuerger am Grand-Duché Neies entdecke kënnen. Ee Beispill wieren d‘Péitrusskasematten, an déi vill Suen investéiert gi wieren an déi am Summer fir de Public wäerten opgoen, esou d‘Lydie Polfer.

„D'Kasematten ënnert dem Bock sinn zanter laangem gutt bekannt. Ma elo hu mer ganz vill investéiert, fir d'Kasematte vun der Péitruss nei ze maachen an déi wäerte mer geschwënn aweien.“

Eng aner Neiegkeet ass eng virtuell Zäitrees, déi een den Ament scho kann duerch de Pafendall maachen. Do fiert ee mat engem klenge Bus duerch d'Stroosse vun der Stad a gesäit iwwert e Virtual-Reality-Brëll, wéi dës Stroosse fréier ausgesinn hunn. Eng Offer, déi grousse Succès hätt, an et elo soll ausgebaut ginn, seet d'Lydie Polfer.

„Dat wëlle mer awer fir déi ganz Stad maachen. Wann een herno eng Kéier kann iwwert de Boulevard Royal fueren a gesi wéi dat virun 120 Joer war, an dann duerno wéi et viru 50 Joer war, do gesäit een dann, wéi dës Stad vill a schnell evoluéiert huet an deene leschten 100 Joer. Während Dausend Joer war et eng Festung mä vun do un, wéi déi ofgerappt ginn ass, huet dës Stad wierklech e ganz groussen Developpement kannt. An et ass gutt, dass een sech däers bewosst ass, well mir sinn elo an engem Moment an deem d'Stad och nees vill ännert.“

Grad fir Famille mat Kanner géif den Ament vill gebuede ginn, seet déi Stater Buergermeeschtesch.

„Mir wëssen, d'Lëtzebuerger, déi reese vill a maachen oft Vakanz am Ausland. Dat ass och an der Rei, mä et soll ee sech och bewosst sinn, hei am Land ginn et esou vill schéin a flott Saachen ze maachen. Besonnesch och fir Famille mat de Kanner. Mir hunn zum Beispill e grousse pädagogesche Programm an der Villa Vauban, wou mer mat de Kanner ganz speziell spillen, an dat huet grousse Succès. A wann d'Kanner bis d'Eltere bei der Hand huele fir an de Musée, da si mer op der gewonnener Säit.“

Iwwer Land setzt den Tourismusministère kloer op den Aktiv-Tourismus. An den nächste Jore sollen eng 600 Kilometer zousätzlech national Vëlosweeër gebaut ginn. Eng wichteg Kooperatioun tëscht dem Infrastruktur- an dem Tourismusministère, seet de Lex Delles.

"Do wäerte mir an Zukunft ganz enk zesumme schaffen, fir och d'Gemengen dozou ze bréngen, sech un déi Pistes cyclables unzeschléissen. Dat aus enger touristescher Offer, fir dass den Tourist, deen iwwert eng Piste cyclable, e gesécherte Vëloswee fiert, och eng touristesch Offer an enger Gemeng oder op enger kultureller Plaz ka wouerhuelen. Dat heescht, wann e mam Vëlo ënnerwee ass op de Vëlosreseauen, kann op der Kräizung no lénks oder no riets fueren a sech dann eben eppes Touristesches ukucke goen oder an eng Gemeng erafueren e Kaffi drénken.“

Iwwert dee Wee sollen och lokal Attraktiounen erëm méi opgewäert ginn.