E Samschdeg de Moie war den en éischte Workshop zu Esch, wou sech mat der Zukunft vun der rouder Lëns beschäftegt gouf.

Zanter 1977 gëtt den Terrain vun der "Lentille Terres Rouges" net méi exploitéiert. De Projet "Rout Lëns" soll dem Site neit Liewen anhauchen.

Zu Esch soll tëscht der Rue d'Audun an der Rue Barbourg en neie Quartier entstoe mat Wunnengen, Büroen, Butteker, klenge Firmen, Restauranten, Caféen, enger zentraler Plaz an engem ënnerierdesche Parkhaus. Déi historesch Valeur vum Site soll dobäi net zerstéiert ginn.

Op ronn 11 Hektar soll de Quartier "Rout Lëns" en neien Espace public mat ville Gréngfläche ginn, dee Commerce, Schaffen a Liewe matenee verbënnt. A well dat Ganzt am Respekt an der Valorisatioun vun der industrieller Patrimoine soll entstoen, solle verschidden al Gebaier och net ofgerappt, mä bestoe bleiwen an an de Projet integréiert ginn. Erhale bleiwen déi al Turbinnenhal, d'Gebléishal, d'Lager, dat fréiert Stellwierk, sou wéi déi al stenge Mauer laanscht d'Rue d'Audun.

Den neie Quartier soll och eng Verbindung sinn tëscht der Brillplaz an der Hiel. D'Suitte vum Projet op d'Ëmwelt sollen esou kleng wéi méiglech bleiwen, deemno gëtt d'Bebauung, wat méi no bei Gréngflächen, och manner dicht. Ressource wéi Energie a Waasser solle mat Hëllef vu modernen Technologië verwalt ginn.

En Zäitraum fir de Projet gëtt et nach net. Eleng beim Ëmsetze vum komplette Projet gëtt mat engem Zäitraum vu 15 Joer gerechent. Gebaut gëtt an Etappen, woubäi deen Deel, dee méi no beim Zentrum läit, den Ufank mécht.

© Domingos Oliveira

An der nächster Suite vun dëser ganz beléifter Serie op RTL.lu hëlt den Domingos Oliveira Iech mat an bei ArcelorMittal zu Schëffleng.

Iwwer dës Serie

An dëser Serie bréngt RTL Iech Impressioune vu bekannte Plazen, déi et geschwënn net méi gëtt, well si ofgerappt ginn oder soss "verstoppt" sinn.

1) Den Ufank hat den Agrozenter Miersch gemaach.

2) An der Nummer 2 goung et ëm de fréieren Zoo zu Senneng.

3) An der drëtter Editioun goung et ëm déi fréier Schwämm bei der Gantebeensmillen zu Hesper.

4) An der 4. Fotoreportage goung et ëm d'Geeschterstad am Syrdall!

5) Déi 5. Fotogalerie dréit sech ronderëm den Zoustand vum Ariston zu Esch.

6) Déi 6. Galerie war den "Aldringer", iert en ofgerappt gouf.

7) Am 7. Deel vun der Serie goung et ëm de Policemusée um Verluerekascht.

8) Am Deel 8 vun der Serie goung et ëm e Kierfecht fir al Pompjeeween.