D'Organisateure schwätze vu ronn 1.500 Manifestanten. Um 18 Auer war d'Manifestatioun eriwwer. D'Rout Bréck misst deemnächst nees opgoen.

AUDIO: Fridays for Future Demo / Reportage Tim Morizet

E Freideg koum et um Kierchbierg zur zweeter Demonstratioun vum „Youth for Climate“. Et war den zweete Protest innerhalb vun 2 Méint. Knapp 1.500 Léit hate sech um 15 Auer op der Europäescher Plaz virun der Philharmonie versammelt. Kuerz drop goung et mat vill „Tamtam“ Richtung Rout Bréck.

Tëscht 15 an 18 Auer war d'Streck op der Rouder Bréck deels fir de Verkéier gespaart.

Ma et war eng friddlech Manifestatioun fir op d'Klima-Urgence opmierksam ze maachen. Vill vun den Participante waren och scho bei der éischter Demo mat vun der Partie. Et wollt een, esou kuerz virun den Europawalen, nach eng kéier op Wichtegkeet vum Vott e Sonndeg erënneren. Et wier eng Klima-Wal, esou d'Organisateuren.

Jonker nees fir méi Klimaschutz op der Strooss
D'Organisateure schwätze vu ronn 1.500 Manifestanten. Um 18 Auer war d'Manifestatioun eriwwer. D'Rout Bréck misst deemnächst nees opgoen.

Bei der 1. Protestaktioun am Mäerz waren d'Schüler an der Schoul entschëllegt, wa se e Schreiwes vun den Elteren haten. Dës Kéier hu se näischt beim Educatiounsministère gefrot.

D'Europawale wären och Klima-Walen, mä d'Organisateure hate virdru schonn op Facebook geschriwwen, datt si keng politesch Fändele wéilten e Freideg gesinn. D'Manifestatioun sollt net fir politesch Zwecker genotzt ginn, net vun de Parteien op de soziale Medie benotzt ginn. Politiker konnte matgoen sou wéi all aner Leit och, mä sech w.e.g. am Hannergrond halen.

Net nëmmen hei bei eis, mä och bei eisen däitschen Noper ware fir dëse Freideg Protestaktioune geplangt, ënnert anerem zu Tréier. Fir d'zweete Kéier huet d'Youth for Climate Beweegung ee globale Klimastreik annoncéiert. An am ganzen 118 Länner wëllen déi Jonk nees fir méi Klimaschutz protestéieren. D'Aktioun ass Deel vun der internationaler Fridays for Future-Campagne vun der schwedescher Schülerin Greta Thunberg.

VIDEO: Fridays for Future
E Freideg sinn déi Jonk nees fir méi Klimaschutz op der Strooss.