No der CSV an de Pirate reagéiert elo och d’ADR am Dossier "geheime Casier".

Am Dossier „geheime Casier“ iwwerschloe sech déi politesch Reaktiounen, ausser déi Lénk, déi sech bis ewell nach net zu Wuert gemellt hunn, fuerderen all d'Oppositiounsparteien, dass Transparenz an dësen Dossier kënnt. D'ADR freet d'Asetze vun enger parlamentarescher Enquêtëkommissioun, d'CSV wëllt wëssen, wéi eng Donnéeë stockéiert ginn, an d'Piraten hätte gär, dass d'Regierung endlech hier Responsabilitéit hëlt a kommunizéiert. Wann de Justizminister sech bis elo nach mat Äntwerten zréckgehalen huet, gouf et um Dënschdeg dann awer eng éischt mëndlech Reaktioun vum Policeminister.

VIDEO: Geheime Casier: Oppositioun: Justizminister soll reagéieren
Wat déi "geheim" Casiere vun der Police uginn, fuerdert d'Oppositioun dann elo Reaktioune vum zoustännege Minister.

D'Oppositioun fuerdert massiv, datt d'Minister elo musse Ried an Äntwert stoen. En neit Gesetz huet déi Policefichieren nei gereegelt, mä virun allem, betount de Gilles Roth vun der CSV, gëllt d'Onscholdsvermuddung. D'Regierung muss elo Transparenz schafen an der Ëffentlechkeet ze soen, wéi eng Donnéeën iwwert déi eenzel Bierger stockéiert sinn. De Marc Goergen vun de Piraten wëll da mat enger neier parlamentarescher Fro wëssen, wéi ee Minister zu wéi engem Zäitpunkt vun de Casiere Bescheed wousst.

Fir de Roy Reding ass et scho bal e Skandal, datt just de Policeminister an net de Justizminister sech zu Wuert gemellt huet. Hei ass skandaléis, datt de Magistraten e Fichier a Situatioune virläit, wou dëse Fichier guer net dierft virleien.

De François Bausch als Funktioun vum Policeminister wëll dësen Dossier bei d'Dateschutzkommissioun weider ginn, fir dat déi d'Gesetz, wat zanter 1992 existéiert, emol genau soll kucken. Donieft soll awer och gekuckt ginn, wou a wéi een d'Gesetz ka veränneren a verbesseren.

D'Deputéiert Mosar a Roth vun der CSV stellen elo weider parlamentaresch Froen un de Policeminister, am Zesummenhang mam Dateschutz. D'Gesetz géing virgesinn, dass eng Kontrollkommissioun misst kucken, wéi d'Police mat Donnéeën iwwer d'Bierger ëmgeet, an déi Rapporte missten dann un d'Chamber weidergoen. Fir 2016 an 2017 géifen dës Rapporten awer feelen, sou d'Deputéiert a froen Explikatiounen vum Minister.

Am Zesummenhank mam sougenannte „geheime Casier“ freet d'CSV elo eng Reunioun vun der juristescher Kommissioun vun der Chamber, an déi d'Dateschutzkommissioun sollt invitéiert ginn. Déi Chrëschtlech-Sozial wëllen iwwert dee Wee d'Meenung vun der CNPD dozou gewuer ginn, ob déi gesetzlech Basis vun 1992 zum geheime Casier am Aklang ass mam Dateschutzgesetz vun zejoert.

ADR fuerdert Asetze vu parlamentarescher Enquêtëkommissioun

D'ADR fuerdert eng Enquêtëkommissioun a Saache „geheime Casier“: D'Piratepartei géif sou eng Commission d'enquête begréissen, iwwerdeems d'CSV en Dënschdeg an enger Fraktiounssëtzung doriwwer beréit.

AUDIO: ADR fuerdert Enquêtëkommissioun - Reportage Eric Ewald

Dat war am spéiden Dënschdeg de Moien an der Chamber gewuer ze ginn, no enger gemeinsamer Sëtzung vun de Kommissioune vun der Fonction publique a vun der bannenzeger Sécherheet an der Verdeedegung. D'Wierder, déi d'Oppositiounsdeputéiert an deem Kontext am meeschte benotzt hunn, waren déi vun der Transparenz a vun der Kloerheet.

Et misst Kloerheet geschafe ginn, am Intressi vun der Rechtssécherheet vun de Bierger, sot z.B. de Fernand Kartheiser. D'Zil vun där Commission d'enquête wär et, ze kucken, ob Nodeeler fir Leit entstane sinn, ënnert anerem, op een eng Plaz net kritt huet, obwuel keng Veruerteelung virläit.

Mir stellen net a Fro, dass d'Police e Fichier muss hunn, an deem si sech dokumentéiere kann, huet den ADR-Deputéierte gemengt, dat wär an eiser aller Intressi. Ma et missten och Reegele ginn: Eng Fro an deem Zesummenhank war déi, wéi mat deenen Informatiounen ëmgaange gëtt.

De Gilles Roth huet Transparenz gefuerdert. Nodeems zejoert en neit Dateschutzgesetz a Kraaft getrueden ass, misst gekuckt ginn, ob d'Donnéeën an deem „geheime Casier“ deem sengen Ufuerderungen entspriechen. Donieft géif et d'Présomption d'innocence oder Onscholdsvermuddung ginn. Hei géif et eng europäesch Direktiv fir den Dateschutz ginn, gëtt ënnerstrach.

Fir den CSV-Deputéierte muss d'Regierung der Ëffentlechkeet soen, wat fir eng Donnéeën iwwert d'Bierger stockéiert ginn; hien ass och doriwwer verwonnert, dass d'Regierung nach net kloer heizou kommunizéiert huet.

Mir wëlle komplett Transparenz, huet de Marc Goergen dann erkläert. Deen de Moien och nach eng parlamentaresch Fro dozou gestallt huet, wéi ee Minister iwwert wéi eng Casiere Bescheed wousst, fir hei Kloerheet ze schafen.

D'Piratepartei ënnerstëtzt allzäit d'Fuerderung vun der ADR no enger Enquêtëkommissioun.

„Wann d'Chamber mengt, si misst eng Enquêtëkommissioun maachen, da mécht se dat!“, war dem François Bausch seng Äntwert op d'Fro, wat hie vu sou enger Commission d'enquête hält; am Fall, wou et dozou kéim, géifen d'Ministeren op alle Fall Ried an Äntwert stoen. De Minister fir bannenzeg Sécherheet a Verdeedegung huet donieft betount, sech dat Ganzt ugekuckt a schonn eppes decidéiert ze hunn,...:

AUDIO: D'Äntwert vum Minister Bausch

D'parlamentaresch Fro vun der CSV zu dësem Thema géif wuel nach dës Woch beäntwert ginn, huet de François Bausch ugekënnegt, fir deen d'Fro am Raum steet, ob dat entspriechend Gesetz vun 1992 zum „geheime Casier“ haut nach adaptéiert ass. Et wär, senges Wëssens no, net sou, dass eppes Geheimes sollt gemaach ginn, sou de Minister, deen näischt zum konkrete Fall soe wollt, vun deem mer Iech d'lescht Woch geschwat haten.

Iwwerdeems sech d'CSV haut an enger Fraktiounssëtzung mat där Fro beschäftegt, begréisst an ënnerstëtzt d'Piratepartei déi Fuerderung vun der ADR. De Minister François Bausch huet sengersäits ugekënnegt, d'Dateschutzkommissioun an d'Inspection générale de la Police ëm hiren Avis dozou ze froen, a wéi wäit déi gesetzlech Basis vun 1992 zum "geheime Casier" nach am Aklang ass mat aktuelle Gesetzer.

Och Piratepartei reagéiert a fuerdert Transparenz

Communiqué de presse

D'Piratepartei warnt viru Spekulatiounen a wëll ofwaarden bis d'Regierung an der
Affär « Geheime Casier » fir Transparenz gesuergt huet.

D'Piratepartei fuerdert weiderhin mat Nodrock eng transparent, kloer an differenzéiert
Opklärung vun der Situatioun. Et handelt sech beim « Fichier Central » em sensibel Donnéeën
di d'Privatliewe vun de Biergerinnen a Bierger betreffen. Säitens der Regierung wier et
fahrlässeg de soziale Medien an der Spekulatioun di eleng Opklärung vun der Situatioun ze
iwwerloossen. Transparenz säitens der Regierung ass dowéinst kruzial. D'Piratepartei fuerdert
d'Regierung ob dësst net ze ënnerschätzen an endlech hier Responsabilitéit ze huelen - sech
de Froë vun de Biergerinnen a Bierger ze stellen. D'Piratepartei wëll an deem Kontext
rappelléieren datt di blo-rout-gréng Regierung 2013, no engem Geheimdéngschtskandal mat
engem erneierten Usproch un Transparenz a Rechtsstaatlechkeetskritären ugetrueden ass.

Kommunikatioun vun der Piratepartei Lëtzebuerg

Déi Lénk: Convocatioun vu Ministere gefrot

Concerne: Demande de convocation au sujet du fichier central de la Police en présence des Ministres respectifs.

Monsieur le Président,

Par la présente, nous vous faisons part de notre souhait de voir convoquées la Commission de la Justice et celle de la Sécurité intérieure et de la Défense au sujet du fichier central de la Police et des pratiques de son utilisation et d’y inviter Messieurs les Ministres de la Justice et de la Sécurité intérieure et de la Défense conformément aux articles 23 (3) et 23 (4) du Règlement de la Chambre des Députés.

En effet, les questions parlementaires concernant cette affaire se multiplient, tout comme les révélations faites dans la presse. Celles-ci se rapportent aussi bien à la non-existence de base légale, qu'à la potentielle non-conformité d’une telle base de données avec le principe de la protection des données ainsi qu'à une éventuelle utilisation frauduleuse de ces données par une partie de l’administration publique. Ces révélations (fondées ou non) sont d’une extrême gravité et touchent aux principes même d’un État de droit.

Nous estimons que les Ministres responsables devraient se prononcer sur ces questions en commission parlementaire lors d’un échange avec les députés.

C’est pourquoi nous vous prions, Monsieur le Président de bien vouloir transmettre la présente à Monsieur le Président de la Commission de la Justice et à Madame la Présidente de la Commission de la Sécurité intérieure et de la Défense ainsi qu’à Messieurs les Ministres concernés.

Veuillez croire, Monsieur le Président, en l’expression de notre parfaite considération.

Avec nos salutations respectueuses,                                                                                                  

David Wagner et Marc Baum