Donieft huet sech de Claude Meisch fir déi nächst 5 Joer virgeholl, d'Handwierk allgemeng erëm méi attraktiv ze maachen.

Et soll attraktiv sinn, eng Léier ze maachen. An eng ofgeschlosse Beruffsausbildung soll engem d'Diere fir sou vill wéi méiglech weider Diplomer opmaachen. Dat huet sech den Educatiounsminister Claude Meisch fir dës Legislatur op de Fändel geschriwwen. E Mëttwoch de Moien huet hie säi Programm am Beräich vun der Beruffsausbildung fir déi nächst fënnef Joer virgestallt.

AUDIO: Beruffsausbildung / Reportage Maxime Gillen

Et wéilt een an dëser Legislatur e besonnescht Aen op d'Beruffsausbildung leeën, esou de Claude Meisch. Virun allem sollen dobäi Perspektive geschaaft ginn.

„D'Zil ass also, dass kloer ass, dass ee mat der Beruffsausbildung eigentlech all Méiglechkeet huet, déi een och mat aner Ausbildungen huet. Mä de Plus ganz kloer och deen ass, dass bei all Etapp ech awer en Diplom ka maachen, deen eppes wäert ass a säi Wäert behält. A mat deem ech dann ëmmer erëm och dertëschent kann eng Kéier soen, elo geet et dann awer duer, elo wëll ech och mat deem doten Diplom schaffe goen.“

Employeure monéieren dacks de Manktem u kompetenten a qualifizéierte Mataarbechter. Fir deem Problem entgéintzewierke soll engersäits d'Ausbildung besser un d'Besoine vun den Entreprisen ugepasst ginn an anerersäits dofir gesuergt ginn, dass eng Beruffsausbildung an eng Première maache sech net géigesäiteg ausschléissen.

„Mir wësse jo aus der Erfarung, dass, wann e Meedchen oder e Jong vu 15 Joer bei d'Eltere geet a seet, elo wëll ech Bäcker oder Schräiner oder Elektriker ginn, da soen déi vläicht fir d'Éischt emol, maach mol deng Première an da kucke mer. Ech denken, dass et eng Rei vu Jonker gëtt, déi d'Kapassitéit hunn, a mir brauchen an der Beruffsausbildung och Jonker, déi en zolitte Bagage hunn, déi béides kéinte maachen: Hiren DAP an engem Handwierk an op der anerer Säit awer och eng Première. Do si mer am gaangen, Modeller op den Dësch ze leeën an déi wäerte mir mat de Beruffskummeren diskutéieren. An ech sinn eigentlech ganz optimistesch, dass dat e Wee ka sinn, fir méi talentéiert Jonker och an d'Beruffsausbildung eranzekréien.“

Ma fir déi Jonk iwwerhaapt emol fir en Handwierk ze begeeschteren, misste si un dës Beruffer erugefouert ginn, esou de Minister weider. Dofir géifen et eng ganz Partie Initiativen, fir mat de Kanner an Ateliere kucken ze goen, respektiv hinnen d'Méiglechkeet ze ginn, an déi verschidde Beruffer kënnen eranzeschnupperen.