Zanter e Samschdeg den Owend an e Sonndeg de Moien hat et op de Lëtzebuerger Stroossen e puer Mol gerabbelt.

Zu Biissen gouf e Samschdeg den Owend géint 20.30 Auer e Motocyclist schwéier blesséiert. De Mann ass duerch d'Grand-Rue gefuer a wollt no riets an d'Rue de la Laiterie ofbéien. Dobäi ass hien an een Auto geknuppt, dee grad wollt aus der Strooss erausfueren. De Mann hat uerg Verletzungen an huet missen noutoperéiert ginn.

Op der A6, der Areler Autobunn, krute sech an der Nuecht op e Sonndeg kuerz virun 3 Auer tëscht Helfent an dem Zéissenger Kräiz an Direktioun Stad zwee Autoen ze paken. Eng Persoun gouf verwonnt.

Um 01.20 Auer ass zu Nidderkuer an der Péitengerstrooss en Auto an en anere Won gerannt, deen do geparkt war. Och hei gouf ee Mënsch blesséiert.

Da war an der Nuecht op e Sonndeg och nees Alkohol am Spill an e puer Chauffeuren hunn hire Führerschäi missen ofginn.

Um kuerz no 1 Auer war der Police tëscht Räichel an Iewerleng een Auto duerch de Fuerstil opgefall. Den Alkoholtest war positiv an de Führerschäi gouf agezunn.

Géint 2 Auer gouf dann zu Esch ee Chauffeur erwëscht, deen och ze vill gedronk hat a géint deen ee Fuerverbuet virlouch. De Mann gouf protokolléiert.

Kuerz viru 5 Auer gouf dann nach zu Diddeleng een Automobilist aus dem Verkéier gezunn. Dësen hat ze vill gedronk an ass säi Permis och lass.