Am RTL-Interview gëtt betount, dass hien sech an dëser Thematik ganz kloer géif positionéieren, och wann dëse Krich nach net an der Regierung Thema ass.

"NEE, NEE an nach eng Kéier NEE zu engem Krich géint den Iran!" esou positionéiert sech e Freideg den Owend de Minister Dan Kersch op de sozialen Netzwierker géigeniwwer enger Lëtzebuerger Bedeelegung an engem méigleche Krich géint den Iran.

Wéi den Dan Kersch weider schreift, wier et evident, dass hei am Moment géif e Krich preparéiert ginn, d'Mediecampagnë géife mat geziilten Noriichten d'Käpp vun de Leit prett maachen, fir "de grousse Krich am Iran".

Den Dan Kersch mécht a sengem Commentaire kloer, dass hien net wéilt bei deem Krich matmaachen, dëse géif Europa immens schueden a kéint en och net méi "verkraaften". Fir de Grand-Duché géif et géigeniwwer esou engem Krich just eng Haltung ginn: "Fir mech perséinlech heescht daat: wann dee vu mär gefoarten Horroszenario - de Krich vun den USA géint den Iran- (an ech hoffen néischt méi, ewéi dass ech mech ieren) antrëtt, gëtt et nëmmen eng méiglech Positioun vun der lëtzebuerger Regierung: daat ass nët eise Krich (wéi all aneren och), mär bezuelen nët dofiir, a Lëtzebuerg gëtt och a kenger Form logistesch Hëllef."

Direkt dono schwätzt de Minister dann och vun engem Récktrëtt, sollt d'Positioun vu Lëtzebuerg awer eng aner sinn: "Ech weien meng Wierder elo gudd of, mee soë kloër: giff d’Lëtzebuerger Regierung majoritär eng aner Positioun anhuelen, giff dat fir mech automatesch bedeiten, dass ech meng Funktiounen nidderléen."

Am RTL-Interview betount den Dan Kersch, dass et him drëms geet an dëser Thematik en Zeechen ze setzen. Dëse potentielle Krich wier vun esou enger grousser Wichtegkeet, dass een sech muss entscheeden, op wéi enger Säit ee géif stoen.

AUDIO: En Zeeche setzen - Dan Kersch

Natierlech wier een nach net an der Situatioun vun engem Krich, sollt allerdéngs de Fall antrieden, da wéist een, wou een mam Minister Dan Kersch dru wier.

AUDIO: D'Positioun vum Dan Kersch ass kloer

Et wier och keen Thema am Regierungsrot gewiescht, et wier éischter als e perséinleche Message ze verstoen. Allerdéngs missten am Fall vun de Fäll och perséinlech Konsequenzen gezu ginn.

AUDIO: Am Moment ass et keen Thema am Regierungsrot - Dan Kersch

Hannergrënn vun den Attacken op zwee Tanker am Golf musse gekläert ginn

Obwuel d'Hannergrënn vun de presuméierten Attacken op zwee Tanker am Golf vum Oman nach ëmmer net gekläert sinn, beschëllegt elo och Saudi-Arabien den Iran. D'USA a Groussbritannien haten déi selwecht Uschëllegung gemaach. Teheran wier net d'Accord domat gewiescht, datt de japanesche Premier am Iran war fir ze vermëttelen, esou de saudesche Krounprënz e Sonndeg.

Den UNO-Generalsekretär hat e Freideg eng onofhängeg Enquête gefuerdert, fir d'Hannergrënn vun den Attacken ze klären. Lëtzebuerg ënnerstëtzt déi Fuerderung, esou den Ausseministère an engem Communiqué. Et géif een déi aktuell Tensiounen och muer am EU-Ausseminister-Conseil thematiséieren. Et wier wichteg, aus de Feeler vum Irak-Krich ze léieren an eng Konfrontatioun an der Golfregioun ze verhënneren.

Sollt et zu engem Krich géint den Iran kommen, misst Lëtzebuerg kloer Positioun dogéint ergräifen - där Meenung ass den LSAP-Aarbechtsminister Dan Kersch. Senger Meenung no wieren d'Vereenegt Staaten am Gaangen, erëm e Krich ze preparéieren. Wa Lëtzebuerg an deem Fall och nëmmen an iergendenger Form logistesch Hëllef zur Verfügung stellen, géif hie säi Mandat néierleeën. Hien hätt dat awer nach net bannent der Regierung thematiséiert, esou den Dan Kersch op Nofro hin.

Den offizielle Communiqué vum Ausseministère

Demain lundi, le 17 juin 2019, la réunion du Conseil des Affaires étrangères de l'Union européenne à Luxembourg sera l'occasion d'évoquer les tensions dues aux attaques du 13 juin dernier contre deux pétroliers en mer d'Oman, près du détroit d'Ormuz.

Il est nécessaire et urgent que toute la lumière soit faite sur ces attaques et que les responsabilités soient établies. Nous rejoignons l'appel lancé vendredi à New York par le Secrétaire général des Nations Unies, António Guterres, pour qu'une enquête impartiale soit effectuée.

Le Luxembourg attache une grande importance à la sécurité et à la stabilité régionales, ainsi qu'à la liberté de navigation qui doit absolument être préservée. Nous savons à quel point le détroit d'Ormuz est important pour le commerce international.

Nous appelons l'ensemble des acteurs concernés à la retenue et à la désescalade. Ce n'est pas maintenant le moment de pointer du doigt les uns ou les autres. Une confrontation dans le Golfe serait une grave menace à la paix et à la sécurité de toute la région. J'espère que la raison prévaudra, que les responsables concernés garderont la tête froide et ne s'aventureront pas dans des actions militaires.

L'histoire nous a enseigné, avec le déclenchement de la guerre en Irak et ses conséquences, qu'on ne résout pas les problèmes en faisant parler les armes. La diplomatie doit primer.