Virun Nationalfeierdag war en Donneschdeg déi traditionell Militärzeremonie op der Place Guillaume zu Dikrech, a Präsenz vum Arméiminister François Bausch.

An den nächste Jore wäert verstäerkt an d’Moderniséierung an an d’Equipement vun der Arméi investéiert ginn, huet den Verdeedegungsminister François Bausch en Donneschdeg de Moien op der Militärparad zu Dikrech wësse gedoen. Am Virfeld vun Nationalfeierdag gëtt jo all Joer d’Militärparad an der Garnisounsstad organiséiert. Militärkommandant war den Yves Kalmes. No de Festivitéiten op der Kluuster war den Défilé an der Rue Stavelot.

Um Bord vun der Militärparad goufen aktuell Sujeten ugeschwat. Direkt am Ufank gouf un dee rezent verstuerwene Grand–Duc Jean, grad ewéi un déi zwee Demineuren erënnert, déi am Februar bei engem trageschen Incident am Munitiounsdepot vun der Arméi um Waldhaff ëmkomm sinn. An deem Kontext, goufen 2 weider Demineure schwéier blesséiert.

Zejoert war d'Lëtzebuerger Arméi bei Militärmissiounen am Afghanistan, am Mali an a Litauen present. Donieft war een Deel vun den Zaldote bei engem Nato-Exercice an Norwegen bedeelegt. Op nationalem Plang war d’Arméi virun allem am Asaz am Kader vun der afrikanescher Schwéngspescht wou se dozou bäigedroen huet, datt een Zonk laanscht déi belsch Grenz opgeriicht gouf.

Donieft, ass een op d’Rekrutéierungsproblemer bei der Arméi agaangen.Verschidden Initiativen a Mesurë goufen ëmgesat, ma bis ewell hätten dës awer net deen erhofften Erfolleg bruecht, esou déi Responsabel. Dowéinst misst een elo nei Weeër goen an deem mat Adaptatiounen entgéint steieren.

An Zukunft wëll ee virun allem an d’Moderniséierung vun der Arméi investéieren. Beispillsweis an de Militärzentrum um Härebierg, an de Schéissstand am Bleesdall an an de Munitiounsdepot um Waldhaff. Fir hiren Déngscht goufen dann och eng Rëtsch Leit vun der Arméi mat enger Medail ausgezeechent.

Traditionell Militärzeremonie zu Dikrech
Besonnesch den trageschen Incident um Waldhaff am Februar an d’Rekrutéierungsproblemer bei der Arméi stoungen dëst Joer am Virdergrond.
Wat ass um Nationalfeierdag a virun allem um Virowend lass?
Detailer iwwert den Oflaf vun Nationalfeierdag an awer och iwwer de Virowend, wou op ganz ville Plaze gefeiert gëtt.

Generalprouf vun der Militärparad um Kierchbierg

Et ass déi alleréischte Kéier, dass de Cortège fir Nationalfeierdag net an der Avenue de la Liberté ass. Wéinst dem Tram-Chantier hunn d’Organisateure sech dëst Joer missen eng nei Platz sichen. De Kierchbierg ass et schlussendlech ginn. En Dënschdeg war do d’Generalprouf.

Dausende vu Spectateure bewonneren all Joer d'Militärparad op Nationalfeierdag an déi Disziplin, déi d'Arméi, d'Police, de CGDIS an d'Militärmusek un den Dag leeën. Gewéinlech ass d'Militärparad an der Avenue de la Liberté, ma dëst Joer ass se um Kierchbierg an der Avenue John F. Kennedy. Ronn 850 Leit si beim Defilé dobäi. Déi, déi ze Fouss matginn an déi, déi an de Ween setzen. Eigentlech eng Routine fir si all, ma well et eng nei Plaz ass, ginn et natierlech och Saachen, déi änneren an un déi ee sech gewinne muss. Um Kierchbierg stinn hinnen zum Beispill net esou vill Bunnen zur Verfügung wéi op der Avenue de la Liberté.

Ob d’Parad an Zukunft um Kierchbierg bleift, ass nach ongewëss. Ma gewosst ass awer, dass se dat nächst Joer jiddefalls nach eng Kéier um Kierchbierg wäert sinn. Ee grousse Virdeel, deen de Kierchbierg bitt, ass den ëffentlechen Transport, deen op Nationalfeierdag natierlech och erëm fir näischt ass. Mam Funiculaire an Tram kënnt een also dëst Joer och besonnesch gutt ouni Auto bei d'Parad.

VIDEO: Generalprouf vun der Militärparad
Dausende vu Spectateure bewonneren all Joer d'Militärparad op Nationalfeierdag. All Handgrëff muss setzen.