Helperknapp ass déi éischt Gemeng, wou d'Drénkwaasser-Reserven un hir Grenze stoussen. Dat huet d'Gemeng en Donneschdeg de Moie matgedeelt.

D’Gemeng Helperknapp huet eng Phase de vigilance erausginn, well hir Drénkwaasser-Reserven duerch d’Hëtzt a wéineg Reen an de leschte Woche lues awer sécher un hir Grenze kommen.

Dofir sollt ee spuersam domat ëmgoen an op verschidde Saachen, wéi d‘Wiss nätzen oder den Auto wäschen, verzichten.

Och d'Gemeng Maacher hat hir Awunner en Dënschdeg wéinst den aktuelle Meteoskonditiounen opgefuerdert méi lues mam Drénkwaasser ze maachen. Dëst als reng Virsiichtsmoossnam par Rapport zum Waasserverbrauch.

Avis de chaleur vum Wiederdéngscht

Fir en Donneschdeg huet den nationale Wiederdéngscht en Avis de chaleur erausginn, mat Maximaltemperature vun 32 Grad. Dobäi kommen awer och nees héich Ozon-Wäerter, déi virun allem eeler a gesondheetlech ugeschloe Leit kënnen affektéieren.

E Mëwttoch gouf zu Veianen beispillsweis 183 Mikrogramm Ozon pro Kubikmeter Loft gemooss, dat ass méi wéi den zoulässegen europäesche Seuil vun 180 Mikrogramm.

Eng 100 Uriff beim 112 wéinst den héijen Temperaturen

No den extremen Temperature vun e Mëttwoch, deelt den 112 mat, dass eng 100 Appeller an hirer Zentral era koumen, déi mat der Canicule ze dinn haten.

60 Mol hunn d'Rettungsdéngschter mussen an den Asaz, fir Leit ze hëllefen, déi besonnesch ënnert der Hëtzt gelidden hunn.

Donieft goufen et 6 technesch Interventioune respektiv well et gebrannt hat

Sou zum Beispill um Donneschdeg de Moie géint 1.50 Auer an der Rue de Trêves um Findel. Hei hat et an enger technescher Installatioun gebrannt. Et ass kengem eppes geschitt. Am Asaz waren d'Pompjeeën aus der Stad a vu Sandweiler.

Géint 20 Auer e Mëttwoch den Owend war zu Nidderkuer an der Rue St. Pierre eng Friteuse a Brand geroden. Och hei ass kengem eppes geschitt. D'Pompjeeë vu Suessem-Déifferdeng waren op der Plaz.

Op der Collectrice du Sud Direktioun Péiteng war e Mëttwoch den Owend géint 18.40 Auer en Auto a Brand geroden. D'Pompjeeë vu Schengen a Munneref waren am Asaz. Et blouf beim Materialschued.

Ee Blesséierte gouf et an engem Accident kuerz no 17 Auer um Wandhaff Direktioun Garnech. En Automobilist war mat sengem Gefier an e Bam gerannt. Nieft de Rettungsdéngschter vu Käerch a Stengefort war och de Samu op der Plaz.