An engem Accident e Sonndeg den Owend géint 21.40 Auer tëscht Bieles an Uewerkuer goufen net manner wéi 8 Persoune blesséiert.

Zwee Autoen waren anenee gerannt, mellt um Méindeg de Moien den 112. Op der Onglécksplaz waren d'Rettungsdéngschter vu Käerjeng, Suessem-Déifferdeng an Esch mat am ganzen 4 Ambulanzen. Wéi d'Zeitung L'Essentiel op hirem Internetsite schreift, wier ënnert de Blesséierten och ee Puppelche gewiescht. Déi 8 Persoune solle liicht verwonnt gi sinn.

Accident e Sonndeg den Owend géint 23.45 Auer zu Toodler an der Haaptstrooss. Een Auto war an d'Ongléck verwéckelt. Dräi Persoune goufe blesséiert. D'Ambulanze vun Ettelbréck a Wolz waren am Asaz, souwéi den Interventiounszenter Alebësch.

Géint 19 Auer waren zu Colmer-Bierg an der Rue d'Ettelbruck zwee Motocycliste gefall. Eng Persoun gouf verwonnt. D'Secouriste vu Schieren a Kolmer-Bierg waren op der Plaz, souwéi d'Ambulanz vun Ettelbréck.