Dat deelt den Daachverband vun de Versécherungsgesellschaft ACA um Mëttwoch mat.

Bei den 100 Milliounen Euro sinn och Indemnisatiounen fir Material a Miwwelen, déi duerch den Tornado zerstéiert goufen, mee awer och d’Relogementskäschte fir Leit, déi net méi kënnen doheem wunnen, sou de Marc Hengen.

Den Administrateur-délégué sot et wier lo un den Assurancen, fir mat de betraffene Leit ze kucken, wéi laang se nach mussen am Hotel wunnen a wéi dat finanziell gereegelt gëtt.

Nächst Woch kéint et eng Koordinatiounsversammlung vun den Assurancëgesellschafte ginn, fir dat sou séier a sou gutt wéi méiglech z’organiséieren.

Vum Marc Hengen war et iwwregens nach de Message un d’Leit, datt se nach ëmmer kënnen e Schued mellen, och wa se dat bis elo nach net gemaach hunn.

D'Fro vum Bezuele fir d'Logéieren

Nom Tornado an de Gemenge Péiteng a Käerjeng kënnen eng Rei Awunner nach ëmmer net zeréck an hir Haiser a Wunnengen, d'Leit sinn ënner anerem an Hotelle logéiert. Do stellt sech d'Fro vum Bezuelen.

D'Gemeng Käerjeng géing all d'Käschten iwwerhuelen, d'Gemeng Péiteng awer net méi, sot e concernéierten Hotelier RTL géintiwwer.

De Péitenger Buergermeeschter Pierre Mellina erkläert, datt d'Gemeng effektiv net méi fir d'Logements- an d'Iesskäschten opkéim, soubal d'Assurancë géinge spillen: "Déi eng oder aner Famillen hunn dat ausgemaach mat hiren Assureuren. Vun e Méinden u si schonn eng Rei Familljen ofgedeckt duerch den Assureur. Wann do Käschten en suspens bleiwen, wäert d'Gemeng hir Responsabilitéit iwwerhuelen."

Informatiounsversammlungen um Dënschdeg

Den Dënschdeg den Owend waren Informatiounsversammlungen fir d'Awunner zu Lamadelaine a Käerjeng. Fir RTL war de Pierre Weimerskirch zu Lamadelaine, wou vill Awunner en Dënschdeg den Owend zesummekomm sinn.

VIDEO: Informatiounsversammlung: Solidaritéit a Froen no Tornado
Déi betraffen Awunner hu weiderhi vill Froen, ënnert anerem, wéi et elo weidergeet a wéi se gehollef kréien.

Déi lescht Deeg gouf gebotzt a geraumt, d'Ausmooss vum Schued bleift och 4 Deeg nom Tornado ze gesinn, wéi an der Rue Neuve zu Péiteng. Och en Dënschdeg waren nees vill Assurancen ënnerwee, fir Schied opzehuelen, d'Daachdecker sinn zanter e Samschdeg de Moien am Dauerasaz.

Vill Kraaft gëtt de Leit den Dauerasaz vu ville Fräiwëllegen op der Plaz. Eng Ekipp ronderëm de Fräizäit-Futtballclub LAPERO 16 huet en Dënschdeg zu Lamadelaine gehollef opraumen. Nach iwwer 200 Haiser misste gehollef kréien.

Eng Initiativ, wéi vill anerer, déi an de soziale Reseaue lancéiert goufen an de Betraffenen hëllefen. D'Leit hu sech en Dënschdeg weider vill Froe gestallt, grad déi, wéi et elo virugeet.

Solidaritéits-Botzaktioun fir d'Baueren um Samschdeg

Déi verschidde Bauere vu Käerjeng maachen e Solidaritéits-Opruff, fir hinnen ze hëllefen "hir Wisen an Felder vun alle Schied vum Tornado ze botzen, fir datt se hir Béischten nees a Sécherheet kënnen op déi concernéiert Felder
schécken, respektiv hir Felder kënne beaarbechten, ouni heibäi hir Maschinne futtizemaachen."

Rendez-Vous ass e Samschdeg um 9 Auer am Käerjenger Treff.

AUDIO: Informatiounsversammlung: Wéi geet et weider nom Tornado?

Zu Lamadelaine waren en Dënschdeg den Owend ronn 250 Leit, fir 20 Auer war eng weider Versammlung zu Käerjeng geplangt.

D'Familljeministesch huet den Iwwerbléck iwwert d'Hëllefe ginn, virop kënnen d'Offices Sociaux d'Ulafstëll sinn. Ma d'Corinne Cahen huet och iwwer psychologesch Hëllef informéiert.

AUDIO: D'Familljeministesch Corinne Cahen

Ee ganze Pool vu Psychologen, déi spezialiséiert sinn op Trauma, stinn zur Verfügung an d'Leit solle sech beim Familljeministère mellen.

© Pierre Weimerskirch

Och um Feierdag a Sonndeg däerf zu Péiteng geschafft ginn

D'Gemeng Péiteng deelt dann nach mat, dass den Artikel 34 vum Policereglement ausser Kraaft gesat gëtt. Dat heescht et däerf och um Feierdag an e Sonndeg an de betraffene Quartiere geschafft ginn.

Offiziellt Schreiwes vun der Gemeng

Matdeelung un d’Bierger

Den Artikel 34 vum Polizeireglement „Travaux de jardinage et autres“ gesäit vir, datt et net erlaabt ass, sonndes an op engem Feierdag dës Aarbechten ze maachen.

Opgrond vun den aussergewéinlechen Ëmstänn, déi duerch den Tornado vum 9. August entstane sinn, huet de Schäfferot vun der Péitenger Gemeng entscheet, datt dësen Artikel 34 vum Polizeireglement muer op Maria Himmelfaart, de 15. August 2019, grad esou ewéi e Sonndeg, den 18. August 2019, an deene betraffene Quartieren ausser Kraaft ass.

D’Nuetsrou tëscht 19 Auer a 7 Auer – Artikel 32 vum Polizeireglement -, muss awer respektéiert ginn.