Déi héich Temperaturen dëse Summer hunn net just de Leit ze schafe gemaach. Och Gebaier hunn dorënner gelidden.

Déi lescht 3 Woche stoungen d'Touristen, Leit, déi wollte Musek lauschteren, an natierlech och déi, déi wollten an eng Mass goen, virun enger zougespaarter Dier. D'Concerte wiere verluecht, an d'Massen an engem anere Sall, stoung op Ziedelen, déi op d'Paart vun der Paterkierch gepecht waren. Wann ee nom Firwat gefrot huet, war d'Äntwert: aus Sécherheetsgrënn dierft keen eran. Wiertes sinn elo nees Massen, mä just am Säiteschëff vun der Eglise Saint Alphonse. Där hire Buedem hat sech ferm gehuewen, e rare Phänomen, deen d'Kierchen an Zukunft méi dacks kéinten erliewen.

AUDIO: Buedem an der Paterkierch / Reportage Monique Kater

D'Paterkierch an der Stater Kapuzinergaass huet d'Hëtzt an d'Fiichtegkeet ënnert de Maueren net méi ausgehalen an dunn ass géint 18 Auer de Buedem am Mëttelschëff massiv an d'Luucht gaangen. E Méindeg hunn d'Experten d’urgence mat de Fléckaarbechten ugefaangen, well nach esou eng Hëtzt, de Buedem komplett kéint zerstéieren.

Impressionnant Dimensiounen, e Buedem, deen ëm 1900, also ronn 40 Joer nom Bau vun der Paterkierch geluecht ginn ass, an dee sech elo einfach emol, gehuewen huet.

Hëtzt vun uewen a Fiichtegkeet vun ënnen gëtt zesummegezielt: eng Bëls! D'Plättercher, gezeechent Villeroy et Boch, hate kee Sputt, erkläert den Expert, deen aus Erfarung weess, dass ee bei esou eppes, besser net träntelt.

Eraus domat, propper gemaach, zortéiert, an herno genee nom Muster erëm agesat. Mat Sputt, dëst Kéier, fir dass d'Plättercher an Zukunft den Drock besser packen. Mä fir d'éischt gëtt d’Paterkierch komplett duerchliicht an et ginn allméiglech Etüden, dorënner eng Klimaetüd, gemaach

D'Klouschter niewendrun huet d'Congregatioun vum Hellegen Erléiser scho restauréiere gelooss.

Hei an der Kierch ass d’Envergure eng aner. De Buedem huet nämlech als Pendant verstoppte Wandmolereien. Do wieren d'Käschten héich an d'Pateren hoffen op eng massiv Ënnerstëtzung vu Sites et Monuments.

Wéi d'Plättercher an d’Luucht goungen, goufe 26 Grad just iwwert dem Buedem, a der bal 40 uewen op Fënster-Héicht gemooss. Mat esou Temperature mussen an Zukunft all d'Kierchen eens ginn. Mee net nëmmen déi al, mee och déi méi modern aus Beton Armé gi krank. D’Eisestaange bannendra raschten an d’Mauere baschten. Um Briddel huet een dee Problem schonn.